宣淫販賤有官照 法外開恩更逍遙

壹淫媒掛羊頭賣狗肉，打住介紹醫學知識嘅招牌播放第二類不雅物品，藉詞教女性檢查乳房乘機將淫片上網示眾。影視處甘做幫兇，公然玩包庇唔檢控，簡直冇天理！

呢，壹淫媒旗下網站以「如何自行檢查乳房」為名，播出女子裸露胸部短片，全部冇打格，大特寫都出埋，仲有唔少搓揉同按壓胸部鏡頭。淫審處將短片評為第二類不雅物品，影視處竟然話，有關網站喺評級之後已經加咗適當警告字句，所以唔會採取檢控行動喎。

有冇搞錯！影視處擺明放生壹淫媒啫，唔怪得人哋話香港淫邪當道咯。查實，港府厚待壹淫媒已經唔係第一次，見怪不怪咯。呢，壹淫媒旗下刊物違反《淫褻及不雅物品管制條例》過百宗，但次次都被放生，罰款輕則數千，重亦不過數萬。

你話嘞，如果冇港英餘孽包庇縱容，咁嘅積犯就算唔坐穿牢底，亦早就被罰到破產啦，點可能一犯再犯㗎。咦，既然有官府照，壹淫媒不如去盡啲，有咁淫玩咁淫，有咁賤做咁賤囉。

嗱，太一叮有條絕世好橋，家陣無格露乳鏡頭可以播，壹淫媒不妨考慮照辦煮碗，播放埋「檢查子宮癌」同「檢查痔瘡」片段，寓淫賤於醫學，一來可以吸引更多好色之徒幫襯，二來亦可以吸引更多好此道者嚟捧場，志同道合，臭上加臭，包保淫賤黎可以賺到盆滿缽滿。

但咪住，太一叮先此聲明，呢條好橋只係為壹淫媒度身訂造，其他傳媒千祈唔好試。呢，尤其係《東方日報》同《太陽報》，直頭諗都唔使諗，唔係嘅話，隨時畀人告到甩褲。無他嘅，因為只有壹淫媒至可以享受當局法外開恩嘅「專利」。

叮！有辦你睇㗎。當年《東方日報》及《太陽報》刊登名模Kelly Brook性感相，即使打晒格仔，亦被淫審處評為第二類不雅，但係爛果報刊登同一輯相，只係評為第一類非不雅。更古怪嘅係，喺香港有售嘅外國雜誌《NOW》刊出同一輯Kelly Brook性感相，無遮無掩，格仔都冇打，包膠袋都冇，居然連送檢都慳番，更加唔使評級。

同一輯照片，影視處三重標準作出選擇性檢控，唯恐護淫不周，幫壹淫媒幫到出晒面。喺香港，試問除咗一貫宣淫販賤嘅壹淫媒，仲有邊個可以享受咁嘅「禮遇」？睇勻全世界，又有邊個政府好似港府咁姑息養奸，對壹淫媒呢類敗壞社會風氣、荼毒青少年嘅傳媒百擒百縱，容許佢橫行無忌吖？

計太一叮話齋，朝中有人好作孽，所以話，如果壹淫媒食過翻尋味，播放「檢查子宮癌」同「檢查痔瘡」嘅片段販賣色情，包保乜事都冇，不過其他傳媒就唔敢包嘞。叮！