禽流感殺到　防疫咪偷懶

噹！噹！噹！防疫警鐘敲響，禽流感又殺到嘞！有乜應對措施？會唔會擴散？最壞情況會如何？市民又應該點樣防範？一言以蔽之：港府呢次準備好未？

本港一名五十九歲婦人證實感染H5N1禽流感，已由屯門醫院轉往瑪嘉烈醫院診治，情況嚴重。患者早排同家人一起到過上海、杭州同南京，而在港期間曾去過街市，所以，今次究竟係外地輸入或本地感染個案，當局仲係矇查查。食物及衞生局局長周一嶽話喎，今次相信係外地輸入個案，但又唔排除本地感染嘅可能性，佢仲強調禽流感未出現人傳人嘅危機。叮，講咗等於冇講！

講真，禽流感會唔會人傳人的確未有醫學證據，但唔排除短時間內大規模擴散嘅可能，市民絕對唔能夠掉以輕心，港府更加唔可以關人個關，再次錯失防疫先機，重演上次禽流感大爆發，全城變「殺雞工場」，或者沙士肆虐期間，香港淪為死城嘅悲劇。

查實，禽流感嘅陰影一直揮之不去，警鐘從未停過。尤其係本港同內地嘅人流、物流來往頻密，呢單本港七年嚟首宗人類感染個案無論係外地輸入定係本地感染，都顯示禽流感已經兵臨城下，防疫形勢絕對不能低估。仲有，香港已進入流感高峰期，萬一禽流感擴散，蔓延速度可能相當驚人，後果不堪設想。

港府準備好未？睇番當局多年嚟對付疫情嘅低劣表現，真係令人信心打晒折扣。呢幾年本港大小疫情不斷，禽流感、沙士、腸病毒、豬流感、日本腦炎、登革熱輪住嚟，市民次次都驚餐飽，幾乎冇一日過得安心。

遠嘅唔提，淨係講今年夏天嘅手足口病，國家衞生部已經發出疫情警告，內地政府如臨大敵，嚴陣以待，而本港衞生高官仲滋油淡定，大派定心丸話今年本港流行嘅腸病毒同過往種類相若，唔使擔心喎。直至本地有成人懷疑感染腸病毒死亡，至急急腳發出警告，搞到疫情一發不可收拾，感染個案打破過去十年紀錄。

疫情資訊唔止遲過人，更缺乏透明度。港府舊年斥資兩億購入三百萬劑豬流感疫苗，但又冇清楚交代疫苗嘅風險同副作用，唔怪得市民反應冷淡，連本來應該身先士卒嘅醫護人員都唔肯捧場，超過九成疫苗因為無人問津，當垃圾送咗去堆填區，唔止浪費公帑，更令市民對當局嘅抗疫能力失晒信心。

咪話太一叮唔提醒班衞生庸官吖，防疫關係到全港七百萬市民嘅安危，一定要防患於未然，如果得過且過，次次都慢三拍，甚至偷懶唔做嘢，當年禽流感及沙士嘅悲劇隨時重演，到時喊都無謂。叮！