洋和尚無功而退 醫管局切勿再衰

估領袖遊戲落幕，醫管局行政總裁大位邊個坐終於有結果。醫管局尋日宣布，現任質素及安全總監梁栢賢接替幾個月前突然辭職嘅蘇利民，出任行政總裁一職，任期三年。

送走洋和尚，請嚟本地薑，無論醫生工會、護士團體定係病人關注組織，都對梁栢賢出任新職寄予厚望。佢本人亦表示，上任後最大挑戰係解決專科人手短缺、醫生工時過長、員工士氣低落。集萬千期待於一身，呢位醫管局新掌門人能唔能夠做到眾望所歸，市民不妨拭目以待。

想當年，蘇利民呢個毫無醫生背景嘅澳洲洋和尚，喺沙士襲港之後臨危受命執掌醫管局，結果「水土不服」，發揮空間有限，承諾多多但成績差強人意。搞嚟搞去，滅赤宏願毫無寸進，高層架構依然臃腫，前線醫護流失嚴重，醫療事故愈爆愈勁，卒之以「私人理由」劈炮唔撈。

梁栢賢可以話係「少林寺木人巷」出身，二十幾年前由政府醫生做起，資歷完整，算係醫管局行政總裁嘅適當人選。同盲摸摸接手醫管局、下下撞大板嘅蘇利民相比，佢的確有唔少優勢。

之不過，洋和尚唸唔好嘅經，本地薑亦未必識唸。無他嘅，醫管局長期管理不善，早已經變成爛攤子，好聽啲叫積重難返，講句唔好聽嘅，直頭係病入膏肓，幾乎冇得救。如果梁栢賢冇起死回生嘅真本事，只會變成下一個蘇利民。

無論乜嘢奇難雜症，只要對症下藥就有康復機會。梁栢賢應承先解決人手同士氣問題，至少已經知道癥結所在。開講有話，人嘅因素第一，醫管局正正係因為用人不當，肥上瘦下，資源錯配，令醫護人員士氣低落，紛紛出逃，搞到醫療事故同醜聞無日無之，病人對公立醫院失晒信心。

話口未完又衰一鑊。醫管局公布嘅各專科門診輪候中位數，話就話最長十二周，原來有蠱惑。本報追查發現，專科新症輪候時間查實短則四個月，長則兩年半。就算只係小病，拖到見專科醫生嗰陣，分分鐘變大病。正如有腰痛患者話齋，等到癱咗都未必輪得到，直頭係攞病人條命較飛。

○八年有立法會議員提出質詢，要求醫管局正視專科輪候時間過長嘅問題。局方提出咗一大堆「改善措施」。勢估唔到，醫管局最近對本報查詢嘅回應，居然同兩年前對議員講嘅「改善措施」一模一樣。醫管局根本乜都冇做過，你話係咪激鬼氣吖！

太一叮都係嗰句，梁栢賢新官上任千祈咪得三把火，燒完算數。既然斷啱症，就要落重藥，直到斷尾為止。如果對頑疾習以為常，變咗能醫不自醫，咁醫管局真係神仙都打救唔到咯！