水務署執漏不力 納稅人流血不止

審計署前日派咗政府部門衡工量值成績表，多個部門被狂插，其中包括水務署。衰邊瓣？咪又係監管不力，愈執愈漏囉。管水衙門原來係嘥水罪魁，水務署不如改名做「水漏署」罷啦！

水漏署唔係徒有虛名o架，即管睇下呢班官老爺點樣漏水。審計署踢爆，由於水務署失職，監察屋邨供水系統不力，全港公共屋邨舊年滲漏流失嘅食水多達一千七百幾萬立方米，相當於八千個標準泳池用水量，折成水費係八千萬元，你話係咪公帑大出血吖？

漏得最離譜嘅屋邨每日食水流失量超過五千立方米，仲多過兩個標準泳池水量。更離譜嘅係，水務署○四年已經發現問題存在，但執漏工程慢過龜爬，家陣都未搞掂。工程一拖六年，納稅人「蝕水」蝕足六年，簡直豈有此理！

喂，港府唔係有個「監察大型屋邨耗水量計劃」咩？唉，監乜鬼吖，就算發現有滲漏，水務署處理慢九拍，連截水咁簡單嘅事都拖得就拖，多多水都唔夠漏啦。呢，上年度有近千次爆水管個案，近四分之一由發現問題到通知承辦商，要花三十分鐘以上。

就算有人開工，人手不足亦往往令搶修時間過長。有六成爆水管個案搶修人員數目唔夠十人，當中四成二停水超過七個鐘。最誇張嘅一次發生喺「重災區」德輔道西，爆喉超過十六個鐘至截斷水管，兩萬幾立方米食水白白流走。

叮！水喉漏水要閂水掣，呢啲常識小學生都知。水務署管水唔識惜水，任由水長流，小數怕長計，更何況一次就流走過萬立方米嘅水，呢條絕對唔係小數，水務署玩忽職守，你話抵唔抵叮吖！

查實，水管老化問題嚴重，東邊爆完西邊爆，大街爆完小巷爆，早已成「香港奇景」，連羅馬噴泉都要企埋一邊。當局承認，本港每年因水管老化爆裂及滲漏浪費嘅食水超過二億立方米，佔總供水量兩成二，即係每年有七億公帑流咗入鹹水海。

水管日日係咁爆，納稅人血管遲早谷爆，當務之急係盡快更換又殘又舊嘅水管。水務署○○年拍晒心口話十五年內更換全港水管，但事隔十年，時間表已經過咗三分二，家陣全港仲有超過五成水管未更換，有啲區更加有七成未換。咁搞法，水務署根本冇可能喺未來五年如期完成「宏圖大計」，除非有奇迹喇。

弊在現實世界唔會有奇迹出現，水務署唯一可以做嘅，就係加快更換老舊水管，清楚話畀市民知幾時搞掂。計太一叮話齋，如果水務署繼續做敗家仔，唔幫納稅人止血，不如先換咗個署長再執漏。叮！