影視處一制兩法　淫賤黎又被放生

朝中有人好造孽，作姦犯科冇有怕。影視處包庇壹淫媒，放生淫賤黎，一而再、再而三、三而百，玩極唔厭，令人嘆為觀止。

淫賤黎旗下公司「超企」印製嘅三份六合彩報《創富》、《六合皇》及《貼士皇》，今年六月被踢爆偷偷更改承印人資料，涉嫌違反《本地報刊註冊條例》，負責監管嘅影視處接到投訴後遲遲冇行動，日前先至將案件交由警方處理，以「報刊上未有印上承印人名稱及地址」控罪起訴三報，但只告出版人公司，放生淫賤黎任董事嘅承印人公司。

執法一拖再拖已經夠晒離譜，兩間公司同樣涉嫌違法，影視處「告一間唔告一間」，更加兒戲。香港實行「一國兩制」，估唔到影視處仲巴閉，實行「一制兩法」，一個制度兩種法律，問你服未！

三份六合彩報承印人資料改來改去，係人都知當中必有蠱惑。報刊註冊資料顯示，三報承印人一直係超企，而超企正正係壹淫媒旗下公司，但今年三月起，三報刊登嘅承印人突然改為「創能有限公司」，連地址都冇。正如學者宋立功質疑，創能不過係一間形同「雞棚」嘅空殼公司，隨時只係頂罪嘅「豬仔」，就算創能呢次被檢控，下次可以有其他公司改名重犯，始終捉唔到真正違法嘅幕後黑手。

叮！影視處捉小放大，淨係告一間空殼公司而放過幕後黑手，擺明又玩包庇啫。話時話，影視處早就唔係第一次放生淫賤黎嘅嘞，壹淫媒旗下網站播放一段所謂「如何自行檢查乳房」短片，早前畀淫審處評為第二類不雅物品，影視處居然唔作任何檢控，包庇包到出晒面。

查實，淫賤黎鬼鬼祟祟，閃閃縮縮，喺三份六合彩報嘅承印人上面做手腳，無非想偷天換日，瞞天過海。係人都知，港產六合彩報長期被人走私到內地，鼓吹賭風，荼毒同胞，害到無數人傾家蕩產，妻離子散，早已人神共憤。可能有人缺德事做得多，怕遭報應啩，於是偷改承印人，諗住掩人耳目，點知手法唔夠高明，漏洞百出，欲蓋彌彰。

講到彩禍害人，真係罄竹難書。呢，福州一名女子為償還巨額地下六合彩賭債，竟綁架鄰居六歲男童，勒索三十萬元，點知家長畀咗贖金後，男童依然被撕票，簡直係喪心病狂。仲有呀，福建南安一名商人賭地下六合彩勁輸過百萬，連父母棺材本都唔放過，居然偽造身份證去銀行提款，卒之被識穿，搞到坐監收場。叮，好似呢啲由彩禍引發嘅人間悲劇，三日三夜都講唔完！

究竟內地彩禍嚴重到乜嘢程度？有人統計過，中國非法彩票市場規模遠遠大於合法彩票，尤其地下六合彩賭額更加驚人。武漢警方日前一口氣搗破十三間非法彩票銷售窩點，有人踢爆，莊家閒閒地一日可以賺過萬。

內地研究彩票問題嘅專家指出，黑彩之所以氾濫成災，皆因刑罰過輕。其實計太一叮話齋，刑罰過輕固然係其中一個原因，但更主要係有人暗中包庇。就以助長賭風嘅港產六合彩報嚟講，喺內地一直未能根除，除咗港英餘孽包庇淫媒，縱容走私分子，內地貪官污吏充當保護傘，亦功不可沒。正所謂，兵賊一家，禍國殃民，叮！