長者搵食艱難 安老純屬吹水

中國人經常以「長命百歲」祝福親友，之不過咁，今時今日，長命百歲未必係福喇。尤其喺香港，好多老人家辛辛苦苦捱咗幾十年，退休後人又老，錢又冇，生不如死，要咁長命嚟做乜噃。

港府成日吹水，話要做到老有所養、老有所屬、老有所為，但就口爽荷包立，一直當老人家係負累。冇錯，香港係就係有個強積金制度，可惜打工仔死供爛供，到頭來都係得雞碎咁多，唔湯唔水，正式係買糖唔夠甜，買鹽唔夠鹹，根本冇辦法應付退休後嘅生活，搞到好多老人家退休後仲要出嚟做嘢，真係諗起都淒涼。

而更淒涼嘅係，老人家身弱體衰，冇任何競爭力，只可以從事低技術工作，仲要飽受歧視，薪酬更被壓到有咁低得咁低。有位六十六歲嘅羅先生，從事保安工作十一年，到退休只有五萬幾元強積金，根本唔夠生活，焗住要繼續捱落去，一日做足十二粒鐘，月薪只有六千元咁大把，食飯坐車已用咗三分一。有個年逾六十嘅清潔阿嬸更慘情，一日做到黑，月薪只得四千零蚊。

其實好多長者本來唔使咁捱嘅，佢哋退休後返內地生活，以為靠退休金可以維持基本生活所需，點知近年人民幣升值，內地物價飛漲，令佢哋無以為繼。加上港府官僚頭腦僵化，墨守成規，硬係唔肯取消生果金離境限制，退休長者無路可走，惟有回流香港，唔係靠綜援度日，就係繼續打工。

太一叮真係想質問班高官：你哋成日話要令長者安享晚年，究竟為佢哋做過乜嘢？你哋退休後有長糧咬，優哉游哉歎世界，卻眼白白睇住咁多老人家捱生捱死，咁就叫做「民心我心、同舟共濟、繁榮共享」咩？

被迫出番嚟打工嘅長者不在少數，統計處數字顯示，今年第二季六十歲以上嘅勞動人口有十七萬，佔總就業人數半成。統計處仲估計，到二○三九年，本港六十五歲以上人口會由現時嘅一成三，升到兩成八。港府再唔未雨綢繆，盡快改善安老政策，到時實天下大亂。

有勞工團體建議，當局應該投放更多資源發展社會企業，提供更多職位畀年長人士，並向佢哋提供培訓課程。呢啲建議係唔錯，起碼可以令長者有份體面工作，生活得更有尊嚴。不過講到底，呢啲都只可以治標，治本之道係盡快推行全民退休保障計劃，真真正正做到老有所養。叮！