港府短視冇腦 創意作品當草

港府成日吹水要扶助創意工業，仲列入所謂六大優勢產業添，可惜，到頭來又係吹水唔抹嘴。

話說本港創作人林氏兄弟舊年創作嘅互動短片《宅男最後的120小時》，最近喺瑞士一個電影節成功入圍最後九強，仲好有機會攞獎添，主辦當局希望創作者可以去當地參展及交流。

講真，能夠衝出香港、走向國際嘅創意成果近年買少見少，今次可以講係機會難得。不過，由於費用不菲，林氏兄弟先後向藝發局同政府資助嘅「創意香港」申請資助去瑞士參展，點知全部撞板，當局嘅理由竟然係短片「與香港無關」。

叮！官員做嘢唔用腦唔出奇，奇在連眼都唔用。查實該短片係由旅發局邀請拍攝，用嚟宣傳香港旅遊，林氏兄弟分文不收，義務唱好香港。短片內容雖然以台灣宅男追女仔為主軸，但好多情節都喺本港發生，山頂、蘭桂坊、廟街、昂坪360呢啲著名景點一一上鏡。上載幾日已經熱爆網絡，點擊率更加屢創新高。

太一叮想問呢班官員，乜嘢至算同香港有關？要拍乜嘢至可以得到資助呢？係拍禮賓府個錦鯉池、拍使五十幾億元起嘅新政府總部，定係拍高官雞手鴨腳做「起錨」騷？抑或係拍家陣仲係爛地一塊嘅「西九龍文娛藝術區」？

講嚟講去，港府官員根本就係葉公好龍，自己想要乜都未搞清楚，點扶助創意工業吖？查實，港府講一套、做一套早有前科。○八年，本港年輕創作人製作嘅動畫短片《隱蔽老人》奪得日本動畫短片大賽「最優秀賞」，主辦單位力邀港府協辦頒獎禮，竟被當局拒絕，理由係「冇着數」。

講開又講，當年港產電影風靡東南亞，贏得「東方荷里活」美譽，但近年就如王小二過年，一年不如一年，講到底都係因為港府唔識珍惜，坐視香港漸失優勢而無動於衷。唉，無可奈何花落去，此情只待成追憶！

文化創意被扼殺，科技創意同樣係牆內開花牆外香。呢，理工大學自行研發嘅電動車，備受外國人讚賞，但港府吼都唔吼，結果香港人嘅發明變咗外國人嘅商機，你話羞唔羞家吖！

當年「風之后」李麗珊喺奧運奪金之後有感而發，話香港運動員唔係垃圾，成為一時金句。計太一叮話齋，唔止香港運動員唔係垃圾，香港創作人員唔係垃圾，香港科技人員亦唔係垃圾，最大嘅垃圾，就係呢班有眼無珠嘅庸官！叮！