庫房豬籠入水 港府幾時回水

做老竇嘅一有錢就顧住自己花天酒地，唔理屋企有冇飯開，一定畀人鬧枉為人父；政府庫房水浸，淨係識得亂咁使錢為自己貼金，懶理民間疾苦，唔肯扶貧紓困，呢啲就叫為官不仁。

港府有意申辦亞運會，但具體要使幾多錢，一直講唔清楚，直到前日先至公開詳細嘅財務顧問報告。唔睇猶自可，一睇把幾火，原來申亞唔只蝕硬，更可能蝕成一百四十億元咁多，而且每年仲要額外使一千五百幾萬做場館維修保養，問你驚未？

唔怪得多數市民反對申辦亞運喇，你估香港嘅錢真係多到冇地方使咩。好多政黨話到明，除非港府徹底解決貧富懸殊問題，否則堅決反對申亞。

政黨就講得啱喇，有錢不如先扶貧，搞乜嘢亞運吖。本港貧富差距愈來愈大，政府坐擁龐大儲備，但係成個孤寒財主咁，對低下階層一毛不拔。呢，當局啱啱公布上半年財政狀況，賣地及補地價收入「爆燈」，多項非土地收入亦狂升，預計全年會有數百億元盈餘。庫房水浸，港府直頭肥到連襪都着唔落，但係就寧願蝕大本申辦亞運，都唔肯增加資源紓解民困，簡直豈有此理！

有立法會議員形容家陣香港係「官富民窮」，講得一啲都冇錯。近排大量熱錢湧入，資產泡沫愈吹愈大，通脹壓力不斷增加，但多數市民實質收入不升反跌，生活百上加斤，港府應該做嘅係還富於民，而唔係好做唔做，搞埋啲唔等使嘅政績工程。

講開好做唔做，港府提出嘅「關愛基金」都算經典咯。當局扶貧交白卷，搞到貧者愈貧、富者愈富，為咗平息民怨，今年施政報告失驚無神提出由政府及商界各出資五十億成立「關愛基金」，但點樣關愛、關愛邊個，好多細節都交代得唔清唔楚，擺明就係急就章，敷衍公眾。

一如所料，關愛基金除咗被指「粉飾太平」之外，商界反應亦非常冷淡。無他嘅，照顧弱勢社群係港府本身應負嘅責任，家陣財政盈餘急升，港府有能力做嘅嘢自己唔去做，仲要拉埋商界落水，都算係縮骨咯。查實，關愛基金引發咁大爭議，完全係港府九唔搭八，唔衰攞嚟衰。

計太一叮話齋，港府連為民紓困呢個最基本嘅責任都唔肯承擔，寧願蝕大本搞形象工程，唔只九唔搭八，簡直不知所謂。要求市民支持申辦亞運？好難咯！