家居安老冇配套 樣樣縮骨太離譜

施政報告事先張揚話以房屋、扶貧同安老做主打，結果完全冇料到。表面上包羅萬有，睇真啲其實空洞無物，既冇願景又冇承擔，市民期望愈高，失望愈大。

唔使睇其他，淨係安老政策港府已經肥佬啦。呢，罔顧民意輿情，拒絕撤銷生果金離港限制，只肯由每年最少留港九十日減到六十日。打個「折頭」就想卸膊，有冇縮骨啲呀？

增加安老宿位係長者最迫切嘅訴求，當局所謂「大幅增加」，其實同「擠牙膏」差唔多，杯水車薪，於事無補。尋日有關注團體踢爆，依家安老院舍輪候時間要兩年半到三年以上，要求當局訂立長遠老人政策，除咗增加宿位縮短輪候時間，亦應該考慮向私營院舍買位。

叮！增加宿位市民提咗N咁多年，港府拖足N咁多年。當局「欠債」愈來愈多，長者輪候時間就愈來愈長。家陣全港每年都有幾千位老人家未等到宿位已經離世，呢個簡直係香港嘅恥辱。

港府見問題積重難返，推出所謂「家居安老」嚟敷衍市民，查實係想諗縮數推卸責任。弊在當局養老得個齋噏，從來都唔上心，將公公婆婆推晒返屋企就關人個關，闊佬懶理，結果搞到一鑊泡。

勞工及福利局局長張建宗前日吹水，話明年初會喺九龍區試行「家居照顧試驗計劃」，為長者提供送飯及陪診等服務喎。不過話口未完，當局就被揭發開空頭支票，搵老人家笨。

有位使用過家居照顧服務嘅婆婆踢爆，長者中心提供嘅上門清潔及陪診服務係判上判，服務質素完全唔掂。好似護理咁，原本每個禮拜會有兩次由專業人士上門做，因為人手唔夠減咗一半，家陣得番一次。職業及物理治療師仲緊張，一年先得兩次咁大把。

唔怪得關注團體要求港府規劃家居安老配套，包括訂定陪老員標準等等，令長者可以喺屋企安度晚年。

安老宿位嚴重不足，當局唔增加資源解決問題，連已經承諾提供嘅服務都要「打斧頭」，樣樣縮骨，實在太離譜。

呢，社會福利署○三年推出嘅「綜合家居照顧服務」就畀人批評係有名無實，唔單止輪候時間超長，就算好彩輪到，服務質素亦好參差。話就話提供清潔、護理、膳食、代購物等服務，但長者屋企冇人打掃變垃圾崗嘅有，因為冇人送飯餓到皮包骨嘅亦有，正一係政策無配套，安老變虐老。

家居安老既解決唔到長者嘅實際問題，亦無法幫家人消除後顧之憂，計太一叮話齋，呢個根本就係圈套。港府氹老人家留喺屋企，自己乜都唔使做，靠害咩！