堆填區擴建撞板 邱騰華自取其辱

港府官逼民反，卒之又撞板。立法會尋晚以壓倒性大比數，通過廢除擴建將軍澳堆填區嘅指令。環境局局長邱騰華成為眾矢之的，變咗「箭豬」。有議員批評佢失職、失誤、失敗，應該同副局長潘潔一齊問責落台。

惡法被廢唔代表當局會認衰，更唔代表郊野公園唔使再被蠶食，成為施政無能嘅犧牲品。

港府呢鋪衰咗，好可能會申請司法覆核同立法會對簿公堂，再推惡法「收復失地」。行政立法打大交，憲制危機隨時爆，香港想唔亂都幾難。有議員希望港府接受立法會決定，如果當局一意孤行將問題訴諸法庭，只會造成雙輸局面，對行政同立法關係造成更大傷害。

查實尋日表決之前，議事堂已經群情洶湧，充滿火藥味。有議員話，呢次爭議凸顯當局無能，管治完全失效。有議員踢爆，港府十八年前曾經「借」過郊野公園嘅土地，結果劉備借荊州，一去冇回頭，到依家仲未還。

叮！港府舊債未了又添新債，呢次居然諗住霸王硬上弓，擴建將軍澳堆填區。山清水秀嘅郊野公園居然變成垃圾堆填區，實在豈有此理！眾怒難犯，議員一面倒支持廢法，完全係意料之中。

港府今次真係輸得難睇。不過，邱騰華似乎未死心，話會就事件通盤考慮，未來一個月會同議員討論處理廢物問題喎。咁即係話，當局隨時都有可能將惡法攞出嚟翻叮，一條黑路走到底，撞到頭破血流為止。

叮！收皮罷啦。呢鑊嘢之所以搞到今時今日覆水難收嘅地步，港府難辭其咎。如果唔係當局撩是鬥非，口口聲聲話議員無權否決，行政部門同立法會嘅關係點會勢同水火？嗱，當日有關指令一出台就犯眾怒，如果當局順應民意撤銷指令嘅話，早就一天都光晒啦。邱騰華不但唔肯撤銷，仲諗住玩拖字訣暗度陳倉，結果咪輸到貼地囉！

講真，港府呢鋪自取其辱完全係邱局長嘅「功勞」。嗱，佢上台三年幾，環保貢獻屈指可數，添煩添亂嘅擾民政策就多籮籮。慳電膽現金券計劃無端端「壽終正寢」、停車熄匙措施愈諮詢愈縮水，變咗自廢武功。眼見施政報告快出台，環保減排又交唔出功課，就想借擴建堆填區威番一次，點知玩出火，連後欄都燒埋。

港府畀立法會明剃眼眉，正一係唔衰攞嚟衰。計太一叮話齋，家陣民意已經好清楚，唔可以將郊野公園變成起垃圾堆填區嘅「土地儲備」。開講有話，退一步海闊天空，除咗收回成命，當局已經冇其他選擇，認輸罷啦！叮！