顧問報告話喎，按現時價格水平，未計興建體育設施嘅三百億元，主辦亞運最保守預測都要使一百零五億元資本開支，三十幾億元運作開支，其中淨係人力成本已經高達七億五千幾萬元，但收入就只得七至八億幾。一句講晒，主辦亞運蝕硬。

講到呢個蝕硬嘅亞運，太一叮諗起「空中樓閣」嘅寓言。話說好耐好耐以前，一位富翁睇見一幢三層樓起得好靚，於是搵人照辦煮碗，點知工匠啱啱起好第一層，富翁就唔耐煩：「我只要第三層，唔要下面嗰兩層！」

大家諗吓，港府吹到天花龍鳳嘅亞運會，似唔似空中樓閣呢？係人都知，香港運動風氣一向麻麻地，港府對運動員嘅支援又到喉唔到肺，興建體育設施更加係甩甩漏漏、拖得就拖，軟件又冇，硬件又冇，可以話係毫無基礎，港府大拿拿攞四百幾億去搞亞運，同興建空中樓閣冇乜分別。

其他體育設施唔講，就講大嶼山南部嗰三條越野單車徑吖，早喺○四年，港府已經提出要喺大嶼山南部興建越野單車徑，當時預計○八年完工。點知拖吓拖吓，拖到○九年至開始研究，最近土木工程署終於訂出具體方案，預計一至兩年內有可能起好喎。

叮！三條簡簡單單嘅單車徑，拖足七年都唔止，咁嘅工程進度，直情慢過烏龜。不過，咁都未算最誇張，早喺○二年已有人建議將新界單車徑連成完整網絡，點知當局一拖再拖，舊年至拍板上馬，可惜由於部分工程流標延誤，市民想享用一條四通八達、設備齊全嘅單車徑，仲唔知要等到何年何月。

唉，今時今日，香港嘅單車徑依然好似斷截禾蟲咁，市民唔方便還在其次，最慘係單車運動員欠缺練習場地，被迫喺馬路練習，搞到險象環生，時不時發生車毀人亡慘劇，簡直係搵命博。做運動員做到咁淒涼，怕且又係香港獨有現象。

人貴有自知之明，港府連單車徑咁簡單都搞到唔湯唔水，甩甩漏漏，仲話要申辦亞運，唔出醜至奇！叮！