邀約派對食檸檬，熱火「大帝」勒邦占士惟有喺球場攞威風！被視為新球季MVP兩大熱門人選占士同雷霆球星「KD」杜蘭特，昨晨喺季前賽難得碰頭，「大帝」即刻發揮王者本色，帶領熱火以103:96輕勝。賽前一日「KD」曾經婉拒占士嘅派對邀約，但強調自己絕唔係「反勒邦分子」，但「大帝」就用行動教訓呢位小子，仲喺Twitter高呼「強者得勝」添！

今場熱身賽喺肯薩斯舉行，賽前一晚占士仲有閒情逸致喺當地夜總會舉行派對，近期人氣急升嘅杜蘭特亦係獲邀嘉賓之一，只係「KD」最後卻未有領情：「我一向好少喺球季期間四圍蒲，特別係比賽前一晚更加絕少外出。」似乎有弦外之音，難免惹起「KD」批評占士專業態度嘅質疑。

KD否認係反勒邦分子

事實上，「KD」同「大帝」嘅對立，可以話係近期美國傳媒刻意營造嘅形勢，影響所及，就連早前公布由NBA各大球隊總經理嘅新球季MVP預測，亦出現更多人支持杜蘭特嘅情況。對於自己成為占士敵對勢力，「KD」則堅決否認。

面對後輩嘅強力挑戰，年僅25歲嘅占士就明捧暗踩杜蘭特，以「小子」稱呼細佢3歲嘅「KD」：「我真係好欣賞所有具天分嘅小子，佢正正係其中之一。」

講番昨晨嘅巨星對決，占士全場獨得22分下，加上好拍檔保殊嘅23分，熱火雖有韋迪養傷，仍能輕鬆擊倒雷霆，當中杜蘭特則只錄得21分。賽後，「大帝」同隊友韋迪不約而同喺Twitter發表言論：「今晚由偉大嘅球隊勝出！」唔知杜蘭特聽見，會有乜感覺呢？