創就業變增失業 悲情城市更悲情

港府好似同市民有仇咁，做親嘢十有八九違背民意，除咗搵笨就係靠害。擴建堆填區係咁，硬銷自願醫保計劃又係咁，甚至連創造就業都可以變成增加失業。

呢，港府○七年話要活化天水圍一幅地皮，以提升社區活力同創造就業職位。講真，社區活力點至算提升任佢哋噏，有多啲就業機會最實際。各界紛紛出謀獻策，點知所提建議統統被否決。發展局冇諮詢市民，今年三月一錘定音，將幅地以短期租約形式批畀房協興建長者服務培訓中心。

嗱，培訓護老人員無可厚非，弊在港府理據不足、烏龍有餘。當局話，培訓中心五年內可以培訓七千五百個學員，實情係，鄰區配套嘅「長者綜合社區計劃」只可以請一千幾百人咁大把，即係有六千個學員冇嘢做！

叮！港府原來唔係創造職位，而係增加失業、製造悲情。多個民間團體前日聯同過百位天水圍居民舉行集思會，直斥當局出爾反爾，對區內居民困苦不聞不問。

更離譜嘅係，民間團體建議都好有建設性，譬如，夥拍知名食家開過百個大牌檔，提供大量基層就業機會。嗱，呢啲咪叫想民所想、急民所急、有的放矢囉。高官學吓嘢啦！死得佢吖，咁正嘅橋居然被當局否決，理由係要提供額外資助喎。

叮！呢頭嗌創就業，嗰頭一毛不拔，連降低失業率都講成本效益。既然係咁，當局一年使幾千萬請班唔講得又唔打得、物非所值嘅副局長同政治助理，效益喺邊呀，又？

查實，港府幫天水圍居民次次都係得個講字，平時關人個關，出咗事一味掛住做騷。呢，前幾年當地接連發生倫常悲劇，高官湧晒入去「視察」，輪住出鏡，呢個話「發展社企」，嗰個應承「增加招聘機會」，托塔都話得，到頭來又係得個吉。

事實係點市民有眼睇。早排有調查顯示，天水圍有超過三成受訪者已失業，或者開工不足四年以上，情況遠遠差過其他區。「悲情城市」愈來愈悲，呢啲咪就係港府「忽然關心」嘅結果囉。

話時話，畀港府算過，草都冇得生，量入為出其實係有入冇出，一提投放資源即刻縮沙。當局前幾年信誓旦旦話要加快美化屯門河，但顧問公司計劃一出，當局左刪右減，連水上餐廳同水上活動中心呢兩個最有特色、最煞食嘅設施都冇埋，優先計劃卒之變縮水工程。

呢次又輪到天水圍畀港府放飛機，有立法會議員話要「自淋紅油」為居民爭取權益。計太一叮話齋，其實應該淋與民為敵嘅高官至啱，施政無能，欠帳太多，市民「追數」，紅油侍候，都算天經地義啩。叮！