擴建堆填逆民意 死撐到底必撞板

勢估唔到一場垃圾堆填區爭議，竟會引起廢法大戰，講唔埋立法及行政機關仲會對簿公堂。

立法會主席曾鈺成已經宣布批准議員提出廢除將軍澳堆填區佔用清水灣郊野公園指令嘅議案，立法會今日將會表決廢法議案。民意一面倒反對擴建將軍澳堆填區，尊貴嘅議員又點夠膽逆民意而行呀，廢法睇怕勢在必行。

呢鋪政府真係輸到乜面都冇晒，唉，早知今日又何必當初。當日有關指令一出台，就畀人炳到七彩，政府如果係識做嘅，撤銷指令咪一天都光晒囉，但佢哋死都唔肯撤，仲想用拖延嘅辦法暗度陳倉，先至會輸得咁慘。

政府死撐話立法會冇權廢除指令。其實計太一叮話齋，立法會有冇權廢除指令並唔係問題嘅核心，關鍵係民意支唔支持擴建堆填區。政府唔理區內幾十萬居民反對，堅持擴建將軍澳堆填區，侵佔清水灣郊野公園五公頃土地，咁樣逆民意而行，唔撞板到頭破血流至奇。

最搞笑嘅係，環境局局長邱騰華仲死雞撐飯蓋，喺立法會表決前夕在報紙發表文章，話立法會如果將今次法律條文爭議視為押後擴建將軍澳堆填區嘅手段，將迫切嘅廢物處理問題輕輕擱置，實非香港之福。佢以為靠嚇就可以令議員支持政府嘅指令，實在太傻太天真。

叮！難為佢講得出口，其實將廢物處理問題輕輕擱置嘅，正正係邱騰華呢班庸官。

多年來，政府對廢物處理一直無所作為，既唔想辦法喺源頭上減少垃圾，又唔肯盡快建焚化爐，講嚟講去都係獨沽一味，有垃圾就堆填，堆填區滿瀉就擴大堆填區。請問邱局長大人，香港有幾多地方畀你堆填？家陣就話擴大到郊野公園啫，第日容乜易連政府總部都做埋堆填區呀。

本來，要處理都市廢物都唔一定用呢種又笨又臭嘅辦法嘅。呢，青洲英坭執行董事莊善敦一早就建議用環保廢物熔化系統嚟處理垃圾。即係將水泥生產過程同垃圾焚燒過程結合，用都市固體廢物取代煤做燃料製造水泥，所產生嘅灰燼又可以循環再用，作為水泥嘅原料。一舉多得，又環保又慳錢，直情係平靚正。可惜政府借咗聾耳陳隻耳，置若罔聞。

因乜事會咁嘅呢？睇怕係唔想畀人哋話官商勾結，利益輸送啩。其實，只要係有利環保又惠及市民，使乜前怕狼後怕虎。

講到底，好多處理廢物嘅好辦法胎死腹中，都係因為邱騰華等人阻頭阻勢，如果畀呢種庸官繼續把持本港嘅環保部門，先至係「實非香港之福」，叮佢個鎯鎯！