警方日前拘捕兩家私人教育中心四名負責人及十六名學生，指佢哋涉嫌訛稱報讀課程，串謀向學生資助辦事處騙取免入息審查貸款，涉及金額高達三百一十萬元。

其實，類似騙案已經唔係第一次發生。○八年，有間教育機構嘅校監涉嫌串謀四名男女，招攬學生入讀假課程，呃咗學生資助辦事處七百五十幾萬元。當局被呃之後仲矇查查，直到廉署派臥底學生揭發，先至破案拉人。

叮，一次係咁，兩次係咁，次次都係咁，大拿拿幾百萬公帑，咁容易就畀人呃走，你話當局做嘢幾兒戲呀！

政府設立各種助學基金，鼓勵市民持續進修，自我增值，本來係好事。弊就弊在當局冇監冇管，把關不嚴，審批求其，學生貸款計劃卒之淪為騙徒嘅提款機，好事變成壞事，簡直豈有此理。

審計署舊年發表審計報告，狂批學資處審批專上學生資助程序寬鬆，追討欠款不力，冇認真審查資料，審核錯誤率高達一成，一年就多批出九千幾萬元資助金額。

學資處把關不嚴已經離譜，更弊嘅係，就算佢哋發現有人提供假資料，依然隻眼開隻眼閉，關人個關。審計報告指，○七至○八年度發現咗三百九十四單問題個案，但係只有十八單轉交畀警方調查。叮，咁樣姑息縱容，騙徒唔膽生毛至奇。

照理講，被審計報告炮轟之後，學資處都應該做啲嘢，執番正啲制度漏洞啦，點知佢哋批評接受，態度照舊，搞到貸款騙案一鑊接一鑊，鑊鑊新鮮鑊鑊甘。今次揭發三百幾萬元貸款被騙後，學資處先至話，要派人巡查學校，以確定有關課程正常運作喎。唉，又係賊過興兵，遲唔遲啲吖！

學資處懶懶閒，騙徒得心應手，公帑付諸東流。截至去年底，專上學生貸款計劃累積虧損二億五千幾萬元，都咪話唔得人驚。大佬呀，呢啲都係納稅人嘅血汗錢嚟㗎，呢班官老爺唔通唔心痛嘅咩？再咁搞法，都唔好叫做學生資助辦事處嘞，不如改名叫做騙徒提款中心罷啦。叮佢個鎯鎯！