高高舉起輕輕放 菲報告令人憤怒

馬尼拉屠殺香港旅行團慘案發生後，香港各界要求菲律賓政府早日查清真相，處分應負責任嘅人士，還死難者一個公道。點知菲律賓政府拖足個半月，尋日先至由總統阿基諾三世公布調查報告，包括對相關人士嘅處分。

對呢位阿基諾三世，香港人不嬲冇乜好感。事件當日，佢喺記者會笑口噬噬，居然話「俄羅斯大劇院人質事件都有人死啦」，畀香港人狂炳冇人性，佢先至知衰，換咗一副嘴臉拍心口要承擔全部責任，又係威係勢咁下令調查真相。

以菲律賓司法部長為首嘅委員會提交咗調查報告，建議起訴一批高官。仲以為菲律賓總算做番啲嘢添，點知經過最高當局上下其手，大事化小，小事化無，報告廢晒武功，對有關官員嘅責任避重就輕。

阿基諾三世將慘案責任推晒畀警方，決定起訴四名警官，包括馬尼拉前警察總長、馬尼拉警區指揮官、特警指揮官及當日嘅談判專家，罪名就輕到唔使恨，叫做「疏忽職守」喎，睇怕都唔會判得重。

更令人反感嘅係，身為危機處理委員會主席嘅馬尼拉市長林雯洛亦被放生，佢作為搶救行動嘅總指揮，居然喺關鍵時刻離開現場指揮中心去酒樓醫肚。咁樣玩忽職守實在太離譜，連調查委員會都唔夠膽保佢，建議刑事起訴，點知總統大人網開一面，改為行政處分。無他嘅，喺菲律賓邊個唔知道林雯洛係總統嘅親信吖。乜嘢叫做親疏有別，有辦睇嘞。

馬尼拉副市長莫雷諾仲夠運，連行政處分都慳埋。唔怪之得佢早前喺調查委員會接受質詢時口氣鬼咁大：「唔通叫我去擋子彈咩？」原來有人撐，梗係定過抬油啦。仲有，被指曾敲詐殺手門多薩嘅副申訴專員岡薩雷斯，亦只係行政處分。講真，如果唔係佢，都唔會將門多薩逼上絕路，累死咁多香港人。咁嘅人都可以放生，仲有乜嘢主持正義可言呀？

講到尾，成件事都冇官員或警察要負刑事責任，咁叫做查處咩？係包庇至真！咁樣高高舉起輕輕放下，香港市民又點會收貨呀？難怪有事件幸存者直斥菲律賓政府無能，調查報告令人失望，尤其係放生要為慘劇負最大責任嘅林雯洛，令家屬更加憤怒。

叮！想當日，因為菲律賓政府無能，令殺手喺眾目睽睽之下殺死咁多香港旅客，家陣求其掟幾個魚仔蝦毛出嚟，係咁意處分吓就想過骨喎，邊度有咁順攤嘅事呀！咪以為七百萬香港人都係傻瓜至得㗎。請問阿基諾三世閣下，咁就叫做負全部責任咩？

其實，計太一叮話齋，靠菲律賓政府調查本來就嘥鬼氣，點會有結果？要追查真相，就要靠我哋香港自己。港府唔係早就派人去菲律賓搜集證據咩，死者遺體亦經過本港專家檢驗，希望當局加快調查，盡早畀市民一個交代。只有真相大白於天下，先至可以撫平社會傷口，告慰死者在天之靈。