昔日太一叮
話說本港早排爆出七年來首宗本地登革熱個案，患者住嗰區居然連誘蚊產卵器都冇放，食環署監察蚊患系統甩漏處處，形同虛設。署長卓永興前日出嚟補鑊，提出三招改善措施，包括增加誘蚊產卵器擺放地點及數目、邀請屋苑同學校加入通報系統，而最騎呢、最戇居嗰招就係扯蚊旗。
乜嘢係扯蚊旗？當局話喎，計劃倣效海灘扯紅旗嘅做法，一旦某區蚊患指數到達嚴重水平就扯起蚊旗，等市民一睇就知嗰區進入登革熱警示級別。
食環署官員高薪厚祿，居然諗出咁嘅屎橋，真係要寫個服字，就好似一個地方經常有人偷雞摸狗，打家劫舍，警察唔加強巡邏，唔去捉賊，日日坐喺差館歎冷氣，淨係扯起紅旗提醒居民出入注意安全，你話係咪荒謬吖？
叮！扯乜鬼蚊旗吖，食環署向惡蚊扯白旗投降就真。正如傳染病專家話齋，呢招根本不切實際，盞浪費人力物力。香港捉蚊協會負責人亦批評所謂新標示方法只係門面工夫，既唔治標又唔治本，不如實事求是做好滅蚊好過。
講真，蚊患嚴重，係人都知應該從滅蚊做起，主動進攻，有乜理由被動退縮㗎？邊區扯咗旗就叫市民唔好去，惡蚊步步進逼，到時區區扯晒旗，市民仲可以去邊？係咁，不如一人派個蚊帳，個個留喺屋企避蚊咪仲實際！
再講，根據食環署嘅白癡邏輯，蚊患猖獗就扯蚊旗，如果烏蠅多咗，使唔使「扯烏蠅旗」呢？仲有呀，本港鼠患愈來愈嚴重，咁咪大條道理要「扯鼠旗」？食環署不如改埋名叫「扯旗署」吖，笨！
叮！惡蚊隨處飛，老鼠通街走，本港環境衞生真係愈嚟愈令人反胃。食環署防蚊唔掂，滅鼠更加不知所謂，搞到香港就快淪為老鼠天堂。呢，港島有間泰國菜館今年中秋晚就上演咗一齣「老鼠贈興賀中秋」，有隻逾呎長嘅老鼠沿裝飾鋼管爬來爬去，嚇到食客走夾唔抖。
市民對食環署滅蚊、滅鼠能力已經失晒信心，署方管理七國咁亂，同樣令人失望。近年涉及食署員工吞泡蛇王嘅醜聞從未停過，返工不務正業，疏忽職守，瞓覺、打波、購物、睇戲乜都有，就算畀人踢爆，署方照樣包庇護短，問你服未？
蚊患、鼠患唔可怕，最得人驚係食環署本身嘅「蛇患」，偷懶吞泡成風，點樣滅蚊捉鼠呀？計太一叮話齋，卓永興扯乜旗都嘥氣，不如先「扯蛇旗」，搞掂手下班大懶蟲！
