呢，家陣成日講「仇富」，咁富豪又點睇呢？新世界發展董事總經理鄭家純前日有嗰句講嗰句，話仇富係因為貧富懸殊愈來愈犀利，搞成咁，政府有好大責任。佢仲批評當局，庫房有巨額儲備，好應該用一部分改善民生。

咦，乜似曾相識咁嘅？冇錯，自由黨前主席田北俊早排發表文章，話香港出現「反商情緒」，完全係當局孤寒成性造成。政府儲備幾乎年年創新高，但只顧累積儲備，唔用稅收扶貧，市民怨氣無碇出，形成仇富情緒，商界就被屈食死貓。

有錢佬係咪食死貓，有冇為富不仁，市民自有公論。不過，有樣嘢百分之二百可以肯定，庫房水浸，政府有入冇出，係孤寒到加零一嘅守財奴、一毛不拔嘅鐵公雞。

叮！貧富鴻溝有幾闊，數字最有發言權。嗱，有跨國顧問公司早排話，本港擁有七百八十萬港元流動資產嘅百萬富翁，截至去年底有七萬六千人，較前年增加逾倍，升幅全球最高。跟手有社福機構統計調查又發現，今年上半年本港貧窮率急升到百分之十八，即係每五個港人就有一個窮人，一百二十六萬人生活喺低收入環境，創下歷史新高。

貧富懸殊毫無改善，兩組數字擺埋，當局睇怕有資格攞「最羞家政府」世界冠軍咯。政府坐擁二萬億儲備，為滅貧做過啲乜？講起嚟更羞家。

除咗回報率奇低、行政費奇高、令打工仔失晒信心嘅強積金計劃，仲有新鮮出爐、旨在推卸公共醫療責任、明益保險公司同私家醫院嘅自願醫保計劃之外，只得每年施政報告同財政預算案入面濕濕碎嘅「派糖」措施。更離譜嘅係，窮人愈來愈多，政府唔去救濟，反而好大喜功，一擲四百億申辦亞運，你話係咪荒天下之大謬呀？

仲有呀，五百億氹人落疊參加醫保計劃，四百幾億申辦一個蝕硬嘅亞運會，政府咁都豪得起，偏偏可以全民得益、為低下階層同貧困長者消除後顧之憂嘅「全民退休保障」，拖足二十年冇晒聲氣。

呢，新官上任冇耐嘅平等機會委員會主席林煥光，亦開聲狂插政府亂使冤枉錢，「畀人買電燈膽、派畀啲唔需要你支持嘅業主免佢差餉」，建議當局帶頭畀墊底費，推動全民退休金。

發財唔立品，政府假扶貧。太一叮好想問吓班高官，香港貧者愈貧，富者愈富，通街現代版「朱門酒肉臭，路有凍死骨」，呢啲算唔算為官不仁呢？叮！