殮房七國咁亂 解剖男女不分

往生淨土難安息，無情白事捱一刀。公眾殮房又爆烏龍醜聞，呢次簡直離譜到冇朋友，因為一連串人為錯誤，女屍畀人當男屍解剖，無辜被劏肚。

富山殮房一位年近八旬老婦嘅遺體前日被錯誤解剖，屍體正前方由喉嚨劏到落肚臍，採完標本檢查後再縫番，查實真係需要解剖嘅，原來係一具男屍。男女不分已經夠騎呢，更匪夷所思嘅係，事前本來有機會糾正，至弊冇人理，卒之鑄成大錯。

衞生署話事件涉及員工冇按指引核實遺體身份。有殮房員工錯誤將老婦身份資料標籤列印，附夾喺一名須解剖男子檔案簿入面。本應貼有男子身份標籤嘅毒理化驗表格亦「順理成章」被貼上老婦嘅標籤，另一位職員發現資料有誤通知醫生，但嗰位高級醫生連解剖令都冇睇就落刀。

事發前一日，老婦家人已經向衞生署申請豁免遺體解剖，並獲死因庭同意，殮房工作人員同醫生居然「冇眼睇」，唔理三七廿一照劏可也。成個遺體處理過程亂晒大龍，制度形同虛設。

每逢爆出呢類「烏龍奇譚」，身為問責官員嘅食物及衞生局局長周一嶽，例牌會企出嚟「遺憾」同「道歉」一番。佢尋日回應嗰陣又係來來去去三幅被，除咗致歉同承諾竭力避免同類事件再發生，仲話如果有關員工嚴格遵守屍體解剖嘅所有程序，事件就唔會發生喎。

叮！又係廢噏，鬼唔知道阿媽係女人咩！如果真係遵守程序，殮房就唔會七國咁亂啦。問題係員工有例不依，漠視守則，連環犯錯。除咗涉事員工，唔通周一嶽一啲責任都冇？

類似嘅廢話周一鑊已經講過N咁多次啦。嗱，○五年公眾殮房被人揭發「屍疊屍」之後，○六年富山殮房又爆領錯遺體醜聞，佢除咗承認有關員工嚴重失職，又話會跟進紀律處分，仲承諾檢討殮房管理系統，防範類似情況再次發生。

結果係點有目共睹，同類醜聞幾乎年年發生，甚至一次比一次大鑊。呢，記得上次東區醫院嘅嬰屍遺體離奇失蹤案嗎？警方成棚人喺將軍澳堆填區大陣仗連搜五日毫無結果，周一鑊要求嚴肅處理唔負責任或表現不佳嘅員工嗰陣，講到口水花亂噴。

叮！事隔一年幾，又輪到富山殮房男女不分劏錯屍。正如有立法會議員話齋，如果有較完整嘅制度，今次事件完全可以避免。當局無能錯上加錯，家人無辜痛上加痛，借番周一鑊自己嘅話講，如果佢一早吸取教訓，加強管理，公眾殮房點會亂成咁吖。

計太一叮話齋，要徹底消滅公眾殮房亂象，最好先解剖一下呢班醫療衞生高官個腦，睇吓入面係咪生滿晒草。叮！