養老當施捨　港府太忤逆

新一份施政報告毫無驚喜，扶貧紓困瓣瓣唔湯唔水。原本期待長者政策有所作為，點知港府繼續卸膊，求其做啲小修小補虛應故事算數，市民大失所望。

當局所作所為令太一叮諗起一個古仔。春秋戰國時期，齊國饑荒餓死好多人，有個貴族喺路邊擺啲食物施捨畀窮人。一日，佢見有個路人餓到企唔穩，就大嗌：「喂，埋嚟食啦！」對方不屑咁話：「我就係因為唔接受嗟來之食至餓成咁。」

港府就好似嗰個貴族，將幫助有需要嘅老人家當施捨，畀得不情不願。最離譜就係生果金，明明惠及長者，竟要諸多設限。當初企圖引入資產審查惹起公憤，港府唔敢再做手腳，但就保留長者不得長期離港嘅限制，夾硬將好多長居內地嘅長者拒諸門外，畀人炳到暈。

港府呢次事先張揚，話安老係施政報告重點之一，市民鬼咁開心，諗住領取生果金離港限制會取消。點知當局又玩花招，淨係打個折頭，領取生果金需要留港嘅最少時間由九十日減到六十日。長住內地嘅公公婆婆日後想攞呢一千蚊，就要繼續舟車勞頓兩頭撲。

叮！按當局嘅如意算盤，只打折唔取消惡例，行政成本冇增加，又可以做番場「敬老」騷，直頭賺咗啦。弊在搵長者嚟搞呢！嗱，唔少老人家長居內地，香港已經冇人冇物舉目無親，更咪講話有間屋。

為咗生果金呢樣重要嘅生活資源，佢哋每年要喺香港住足兩個月，家陣連落腳嘅地方都冇，試問點捱呀？唔通晚晚踎天橋底？瞓公園長櫈？講真，如果有心幫老人家嘅，港府點解唔直接取消離港限制，一了百了吖？

講開又講，呢次施政報告提出嘅所謂安老措施，量又不足，質又唔掂，對解決積重難返嘅長者問題根本係杯水車薪。呢，尋日就有社福團體代表打電話上電台烽煙節目，投訴安老服務不足，踢爆當局承諾增加長者及殘疾人士宿位，又冇提出具體數字。有姿勢冇實際，同開空頭支票有乜分別？

叮！仲有搞笑㗎，施政報告「預告」，遲啲出台嘅財政預算案會有「驚喜」，當局考慮提供更多稅務優惠，鼓勵子女與長者同住。驚乜鬼喜吖，咪又係「居家安老」嗰條舊橋。港府目的只有一個，就係將責任推番畀長者家人，緩和安老院舍宿位長期不足引起嘅民怨。

老吾老以及人之老，令長者老有所養係政府應盡嘅責任，絕對唔係施捨。上面古仔嗰個貴族，最後都知道自己對餓漢太過分而後悔。計太一叮話齋，港府連起碼良知都冇，一啲小恩小惠就想將安老責任推乾卸淨，仲要扮晒「敬老」款，唔止虛偽，簡直係忤逆！