金曲無處唱　天籟亦收聲

港府推動文化藝術發展只講功利，唔睇長遠，莫講話新創作冇機會出頭，連經典製作都面臨厄運。有人話香港係文化沙漠、藝術荒野，睇嚟唔係噏得就噏。

呢嗱，大型露天音樂會係人都聽過，後生仔女就算唔知道幾十年前風靡一時嘅美國胡士托音樂節，一定知道歐美、日本、台灣甚至中國內地嗰啲大型音樂節。查實香港呢方面本來一啲都唔輸蝕，每年一度嘅Wild Day Out Grand Show露天音樂會，吸引本地同外地嘅主流及非主流歌手參與，係本港歌迷必去嘅大派對。

太一叮用「本來」兩個字，係因為呢場樂壇盛事今年可能無法如期舉辦，話唔定變絕唱。事關音樂會十二月開騷，地點到依家都未定。不過咁，如果你以為「卡士」唔夠吸引，音樂會冇人吼，咁就錯得交關嘞。

實情啱啱相反，因為有好多人捧場，而本港一直缺乏適合呢類音樂會嘅大型戶外場地。曾經有戶外環保音樂節因為咁嘅原因被迫取消，就算要辦，亦只能焗住搬入室內。露天音樂會變成劇場騷，你話係咪荒謬吖？

其實，Wild Day Out Grand Show往年曾經喺添馬艦、西九龍、沙田馬場等地方搞過，次次High到爆。家陣呢啲地方冇得用，露天音樂會去邊度開騷呢？當局話，其實香港文化中心露天廣場同沙田大會堂都好適合喎。

叮！咪玩啦，家陣講緊過萬人參加嘅音樂會，唔係街頭賣藝表演。當局求其搵幅蚊型空地敷衍吓就算，搭咗個大型舞台，樂迷連坐都冇碇坐，唔通要歌手對住個天唱咩？

本港缺乏固定嘅露天場地舉辦大型音樂會，已經唔係一日兩日嘞，當局一向闊佬懶理，大型活動愈來愈多，但場地一直冇增加。唉！旨意呢個政府解決問題，蚊都瞓，蛇都死，天籟都收聲啦。

話時話，唔單止露天音樂會被趕絕，連廣受歡迎嘅西九美酒佳餚巡禮，再過兩年亦因為西九文化區工程動工，需要另外搵適合嘅地方搞。

講嚟講去，又係一朝被蛇咬，十年怕草繩。○三年港府為振興經濟，斥巨資贊助美國商會主辦「維港巨星匯」，但推廣不力，監管失職，門票滯銷，甚至有歌星辭演，過億元投資到頭來變爛騷。當局見過鬼怕黑，唔肯投放資源興建大型戶外表演活動場地。

計太一叮話齋，冇充足嘅演出場地，表演者冇咗發揮嘅空間，就無法提供質素高嘅節目吸引觀眾。港府連呢啲最基本嘅道理都唔明，仲講乜嘢推動文化藝術發展吖？