藥廠停牌照生產 衞署淪為無牙虎

香港近排怪事多籮籮，比如講，大家以前有冇聽過停牌嘅藥廠仲可以繼續生產呀？梗係冇啦，依家就有嘞。利奧製藥今年四月份被查出藥物唔夠分量，被停牌，但喺停牌期間居然生產咗三十多款藥品，你話係咪好荒謬？

無良藥廠為咗賺錢，罔顧市民生命安全違規生產，連政府停牌令都當冇到，實在無法無天。利奧尋日發聲明向公眾致歉，仲話會做好回收工作，減低對受影響人士嘅不便咁話。但係問題藥品一早已經流入市面，可唔可以回收齊全仲係未知之數，搞得唔好，分分鐘會爆大鑊。唔係講聲對唔住就可以當乜事都冇發生過。

藥廠違規生產固然罪不可恕，但問題係，咁荒謬嘅事點解會發生？點解利奧藥廠可以為所欲為，唔通真係無王管？當局嘅監管機制做乜嘢㗎？

叮！講鬼咩，衞生官僚乜都唔叻，最叻係做事後孔明。今次例牌又係賊過興兵，衞生署出咗事先至責令回收問題藥品。食物及衞生局局長周一嶽係威係勢咁話，利奧製藥被警告不可製藥期間仍生產藥物，屬嚴重錯誤，唔排除提出檢控或採取其他行動喎。

每次藥品事故曝光後，衞生當局都會提出一大堆指引，睇到人哋頭暈眼花。最弊嘅係，提出咗之後就關人個關，咁搞法，就算提一百條指引都冇用啦。咪以為指引多就可以嚇人，其實藥廠當你哋係冇牙老虎咋，死蠢！

藥品業七國咁亂，都係多得呢班官僚唔監唔管。係人都知道，藥物監管制度不嬲漏洞多多，好多藥廠話就話通過咗優良藥品生產管理規範，但講出嚟可能冇人信，衞生署官員去藥廠兜個圈，睇吓圖紙，連車間都唔入，就叫做檢查咗嘞。咁樣紙上監管，好兒戲啫，唔怪之得停咗牌嘅藥廠繼續生產，嗰班官僚仲矇查查啦。

衞生官僚失職，問題藥品滿天飛。以前有發霉藥、未註冊藥、過期藥，家陣又有唔夠秤藥、停牌生產嘅藥，真係千奇百怪，應有盡有。難怪有人話，喺香港千祈唔好病，唔係嘅話，淨係食藥就會食死你。

講真，今時今日香港真係陷阱處處，市民隨時會中招。呢，萬聖節就快到嘞，後生仔女都鍾意扮鬼扮馬，會戴有色或者有圖案嘅cosplay隱形眼鏡。但係有視光師組織警告，呢類隱形眼鏡戴得唔合適，就會令眼角膜受感染，嚴重嘅仲會致盲。奇怪嘅係，衞生署不監不管，任何店舖都可以賣，唔使驗眼，話之你個個都盲晒啦。

叮佢個鎯鎯，周一嶽同衞生署署長林秉恩梗係戴問題隱形眼鏡戴到發雞盲嘞，唔係嘅話，點解佢哋對問題藥品視而不見。既然有眼無珠，做乜嘢仲喺度害人害物喎，不如早抖罷啦！