校巴驚魂時時有 可憐父母心難安

養兒一百歲，長憂九十九。港府高官下巴輕輕，呼籲每對夫婦生三個，不知今時今日，世界好艱難，社會好危險，生兒育女絕對係一項高投入、高風險嘅動作，供書教學負擔沉重唔在講，周不時仲要驚佢行差踏錯誤入歧途，返學時又驚佢淪為人面獸心嘅狼師獵物。就算好地地放學歸家，都可能搞出個校巴驚魂。

唔係講笑，本月初咋，馬鞍山一個四歲學童懷疑因為跟車保母疏於巡查，被困喺校巴二十分鐘，學童驚醒後拍打車窗，被途人發現報警救出。本報記者跟進，發現同類事件時有發生。

校巴驚魂時時有，為人父母嘅唔驚就假咯。須知幸運唔係必然，過往內地就有好多個小朋友被困校巴焗死。退一步講，就算唔搞出人命，淨係留低個童年陰影已經夠晒難頂啦。心理學家話，學童曾經被困校巴，會造成心理創傷，被困時間愈長傷害愈大，日後可能會怕黑、怕獨處、怕搭，甚至怕搭車怕返學，嚴重影響正常生活。

叮！校巴服務烏龍百出，學校、校巴司機同保母真係應該好好反省啦。講真吖，開車前數人頭，收車前巡車廂，係好基本嘅常識同責任，只要司機保母用心做嘢，校方跟緊一啲，保障學童安全根本唔係乜嘢難事。

唔止校巴服務要升呢，負責監管嘅運輸署都要升呢。唔講唔知，一講嚇一跳，原來對於關乎學童安全嘅校巴服務，運輸署一向只提供無法律約束力嘅安全指引，規矩講咗一大堆，最終都係靠業界自律。家長團體認為，當局應該推出扣分制度，並要求學校通報有關校巴司機同跟車保母嘅疏忽事件。

其實，提升校巴安全辦法多多，問題只係當局有冇心去做嘅啫。譬如德國規定校巴必須設立車站，校巴出入站時其他車輛必須迴避；美國各州每年都會舉行校巴事務大會，探討校巴安全。內地最近亦推行校巴整治行動，包括巡查跟車職員、嚴禁問題校巴行駛等等。既然港府對改善校巴安全束手無策，點解唔參考一下人哋嘅做法呢？

講到底，防患未然點都好過亡羊補牢，校巴行業質素參差，係路人皆見嘅事實，就連業界都呼籲運輸署提供培訓；亦有工程師建議喺校巴上裝置感應器、透氣窗，萬一出事，可以及時發現，亦可降低學童中暑同窒息嘅風險。呢啲都唔係乜嘢難事，當局應該盡量做到，唔好再令父母擔驚受怕啦，叮！