港府做騷有頭威 校園驗毒冇尾陣

毒禍肆虐校園，救救孩子刻不容緩。如果禁毒當做騷，只求先聲奪人，虎頭蛇尾做啲唔做啲，校園永遠都唔可能同毒品講拜拜。

港府舊年喺大埔區率先推行校園驗毒計劃，除咗高調宣傳，仲力排眾議企硬實施。一年就快過，計劃到底成效係點，各界十分關注。保安局副局長黎棟國尋日大唱讚歌，話顧問報告結果正面，呈報吸毒嘅廿一歲以下青少年少咗兩成；涉毒罪行被捕人士亦少咗三成四；自願求助個案大幅增加。

齋睇數字，成效相當不俗，既然咁掂，仲唔全港推行，遍地開花？對唔住，黎棟國話，當局只會鼓勵學校按需要驗毒喎。驗毒計劃唔會喺全港推行，大埔驗毒計劃會延長一年。

叮！真係諗極都唔明。開講有話，打鐵要趁熱，既然反應正面，點解唔一鼓作氣全港「大圍剿」，將毒禍趕盡殺絕呢？「不可一，不可再」，變成「只可一，不可再」，令人啼笑皆非。唔怪得有教育界人士直斥港府將禁毒責任推畀學校啦。

鬼咩，港府一向唔踢唔郁，毒品入侵校園愈來愈嚴重扮睇唔到，直到連續有青少年啪丸、索K出事，引起廣泛關注，至喺未經過充分諮詢情況下，匆匆推出校園驗毒計劃，因為漏洞多多，成效令人懷疑。

諷刺嘅係，有調查指大埔學生對毒品誤解不減反增。計劃係咪好似港府講嘅咁正，似乎要打個問號。當局一向有頭威冇尾陣，睇怕呢次亦唔例外，開騷嗰陣係威係勢，跟住冇咗件事，最終不了了之。

唉，校園驗毒計劃學校搞唔搞自己決定，學生驗唔驗要本人自願，效果成疑。如果當局真係有決心禁毒，唔係為做騷嘅，除咗校園其實仲有好多地方必須認真處理，譬如氾濫成災嘅「藥駕」問題，就唔可以漠視不理啦。

呢，前排一日之內接連有兩個迷幻司機闖禍。其中一個「金毛」司機懷疑索完K神志不清手腳失控，揸住架小巴左搖右擺，嚇到乘客要跳車逃生。好彩小巴最後撞到路邊一架私家車停低，冇人傷亡。

數字顯示，單係今年頭九個月，藥駕個案已比舊年全年急升逾四倍。舊年就有立法會議員建議通過修訂現有醉駕條例，加快針對藥駕嘅立法，但港府一味Hea，一時話涉私隱，一時話驗毒有技術困難，拖到今年七月底至提出建議，幾時立法仲係未知之數。

做騷有頭威，禁毒冇尾陣。計太一叮話齋，如果港府喺禁毒方面繼續無所作為，唔出重招、快招、狠招，香港只會愈來愈多迷幻校園、迷幻飛車。叮！