四管齊下打僭建 有法不依盞o徙氣

今年一月馬頭圍道發生冧樓死人慘劇，家陣諗起仲心有餘悸。港府高官見到棺材先至識流淚，新一份施政報告特別提及樓宇安全問題，聲稱要喺最短時間落實一籃子措施，從立法、執法、支援業主及公眾教育四管齊下，全方位加強樓宇安全咁話。

發展局局長林鄭月娥尋日進一步解畫，話當局準備修例，令屋宇署人員可以入屋檢查、拆毀僭建物，對唔遵守維修令、要屋宇署代為清拆嘅僭建物，當局會向業主徵收懲罰性附加費，如果業主唔肯分攤維修費用，仲會被列為刑事罪行添。

俗語話，治亂世用重典。家陣樓宇安全問題多多，僭建物多不勝數，全港估計最少有數十萬個僭建物，亂成咁，當局修例用重典打擊，遲係遲咗啲，總好過冇到。之但係，修例係一回事，修咗例執唔執行又係另一回事。事關當局打擊僭建物，不嬲都係雷聲大雨點小，有法不依，執法不嚴，再好嘅法例，到咗佢哋手上，都變得形同虛設。

不妨舉個例子。有位市民嘅物業同鄰居嘅單位相隔一個平台，本來相安無事，點知鄰居喺平台起咗一間磚屋，搞到呢位市民個單位連窗都開唔到。佢惟有向屋宇署投訴，點知屋宇署話冇即時危險，叫佢慢慢等候喎，就咁一等就等咗十一年。

講真，屋宇署次次用冇即時危險呢個藉口拒絕處理市民嘅投訴，敷衍了事，拖得就拖，簡直係草菅人命。呢，馬頭圍道嗰棟冧咗嘅唐樓，就係被屋宇署視為「冇即時危險」，點知唔夠一個月就出事。

仲有吖，家陣周街都係僭建招牌，搖搖欲墜，險象環生，但係屋宇署一樣話冇即時危險喎。叮，唔通真係要重演灣仔塌招牌砸死女途人嘅慘劇，先至叫有即時危險？

更牙煙嘅係，近年愈來愈多舊樓業主將單位改建成劏房出租，佢哋唔理樓宇結構安全，連受力牆都夠膽拆。屋宇署隻眼開隻眼閉，有投訴就係咁意派人去巡下，然後又係話冇即時危險，關人個關。

叮佢個鎯鎯，屋宇署呢班庸官懶到出汁，得過且過，多一事不如少一事，話之你死人冧樓啦。呢種惡習唔改，呢種庸官唔除，就算點樣修例都係嘥氣。講到底，官僚作風先至係最大嘅即時危險。