最令港府難堪嘅係，工聯會、公民黨、民建聯、民主黨同社民連呢幾個立法會主要政黨，對香港申辦亞運全部Say No。當局原本打算今年十二月向立法會申請撥款，家陣連曾有意支持嘅政黨都轉軚要求擱置，就算港府最後拍板要申辦，財委會唔放水，如意算盤都幾難打得響。叮！

各政黨成日喺議事堂拗到面紅耳熱，絕少同聲同氣。前排菲律賓班「特蠢」警察，累到無辜香港人質魂斷馬尼拉，各政黨同仇敵愾，聯手發起遊行，要求菲國政府查清真相，追究責任，除此之外，佢哋甚少對某個議題咁口徑一致。

仲有呀，港府就申亞設立嘅諮詢網站，幾乎清一色反對，認為港府應該將資源用喺更有迫切需要嘅地方。嗱，呢啲咪係民意囉。勞民傷財申辦亞運完全係同市民過唔去，如果當局一意孤行，民怨隨時會爆煲。

話時話，發展本港體育運動，鼓勵市民強身健體，香港人絕對唔會反對，仲拍爛手掌歡迎添。至弊港府申辦亞運完全係出於好大喜功，為自己面上貼金多過為本地體育發展着想。

用四百幾億申辦亞運到底值唔值？講真，如果想提高本港體育界整體水平嘅，上次東亞運動會已經試過啦，效果如何有目共睹。運動員成績唔見有乜進步，涉及運動場館質素差、事後場館用途安排欠妥嘅負面新聞不斷。東亞運衰一鋪嫌唔夠，仲要衰多鋪，港府直頭係捉蟲。

早幾日民政局高官落區硬銷申辦亞運，有區議員當面潑冷水，擔心起咁多大型體育場館，賽事過後會淪為大白象，又強調本港社會問題多籮籮，貧富懸殊、租金昂貴、醫療不足、老無所依、少無所教，樣樣迫在眉睫，提醒當局要三思。

叮！有人計過數，四百五十億可以起四分之三條高鐵，買入多幅大型靚地皮，更超過賽馬會一年嘅社會福利支出。呢筆錢如果用得其所，完全可以令市民生活質素改觀。咁大投入可能僅僅換番十幾億元收入，十幾日集體亢奮過後乜都冇，除咗為做政績騷頭腦極度發熱嘅港府，任何清醒嘅人都知唔啱數，唔止蝕硬，更加蝕到入肉添。

政務司司長唐英年話，港府對係咪申辦亞運持開放態度，又死撐申辦預算已經好節制。計太一叮話齋，家陣民意昭昭，人人對申辦亞運耍手兼擰頭，港府不如連申亞諮詢都慳番，無謂再浪費公帑咯。叮！