海下灣有近兩萬平方米土地已被日本財團納入住宅銷售計劃，五年內會起五十幢豪華洋房。發展商本月起陸續喺日本主要城巿推銷項目，強調西貢環境優美，每幢豪宅都會有私家花園甚至泳池。

港人共同擁有嘅天然美景，變咗日本商家售樓嘅「賣點」，係咪諷刺呢？而地政總署回應話，暫未收到有關地段嘅建屋申請，潛台詞係話當局冇嘢可做到，但環保團體擔心，海下灣大興土木必然破壞生態環境。講真，如果港府繼續歎慢板，唔使幾耐，呢個「香港後花園」睇怕變晒有錢佬嘅私家花園咯。

環保人士指出，海下灣屬五十三個未受法定圖則規範嘅郊野公園鄰近鄉郊地區之一，擔心有關發展會威脅沿岸紅樹林及六十幾種珊瑚。呢嗱，日本財團講完靚景又講香港稅務優惠，唯獨唔提點保育自然環境。你話嘞，如果港府等生米煮成熟飯，環境已被破壞再去做嘢，乜都冇得掹啦。

叮！海下灣被「外銷」，根本係大浪西灣保育風波嘅翻版，港府除咗慢九拍之外，既冇切實嘅保育政策，又冇整體規劃，平時懶懶閒，畀人踢爆至補鑊，點保護生態呀？咁搞法，似絕育多過保育啦。

港府出晒名「假保育」，保護生態得把口，家陣全港郊野公園內或邊緣，仲有唔少未納入《分區計劃大綱圖》或《發展審批地區圖》規管嘅鄉郊私人土地，當局管唔到。不過，靚景有價，唔少發展商都想打呢啲地嘅主意，一有機會就落手。

叮！弊在當局永遠都係後知後覺，反應被動，上次香港十大勝景之首嘅大浪西灣十萬平方呎農地被掘成爛地，民間強烈反響，環境局局長邱騰華最初竟然一問三不知，甚至連肇事地點喺邊都搞唔清。呢次同樣離譜，五十幢樓花豪宅賣勻東洋，本港主管部門竟然一啲都唔知情，問你服未！

正所謂，亡羊補牢，未為晚也。大浪西灣保育風波之後，港府本來對未納入分區計劃大綱圖嘅私人土地應該（目及）實啲，邊度屬於有生態保育價值嘅要盡快規劃，講清講楚。但當局並冇吸取教訓，加快行動。一旦呢啲「無王管」私地被破壞，亦唔可以強制要求修復，到時只會剩低永久疤痕。

香港綠水青山買少見少，生態破壞愈積愈多。大浪西灣衰完又到海下灣出事。計太一叮話齋，香港海岸線天然美景遲早消失，得番個人造瘌痢頭。