呢嗱，兵家必爭嘅釣魚島再次風起雲湧吖嘛，日本蠻不講理繼續扣押中國船長，阿崩叫狗叫極都唔肯放人，身為炎黃子孫梗係扯火㗎啦，保釣人士出海宣示主權絕對政治正確。哈，死得佢吖，特區政府居然一而再、再而三利用無厘頭藉口從中作梗，硬係阻頭阻勢阻住地球轉。

第一個無厘頭藉口最荒謬，食環署話喎，懷疑保釣人士出海所用嘅船隻有鼠患，借頭借路上船捉老鼠。喂，食環署捉老鼠有幾叻，心照啦，人哋廣州鼠王單人匹馬一粒鐘捉十幾隻，佢哋人多勢眾一個月未必捉到一隻。由於食環署捉鼠失敗，所以香港嘅心臟地帶中環失驚無神跳出一隻巨型過街老鼠咬傷外國遊客，一時之間淪為國際笑柄。全港十八區「鼠出沒注意」嘅重災區不計其數，全部等住食環署去大顯神通，吖，佢哋度度都唔去，偏偏獨愛保釣船，你話離奇唔離奇？你話抵叮唔抵叮？

至於第二個無厘頭藉口咯喎，荒謬程度不遑多讓。亦叫「釣魚台二號」嘅「啟豐二號」出海嘞，船東羅就揮手高呼：「正式出海攞魚啊，我哋架船從此做番正行，撈正行捕魚！」太一叮本來打死都唔信有人會荒謬到利用「你哋唔係去捕魚」作為打壓理由，不過家陣信嘞，事關政府真係話「啟豐二號」唔係捕魚，所以唔准出海。阻攔出海嘅方法更加係誇張到無倫，五艘水警輪加四艘水警快艇再加一艘海事船重重包圍，然後好似押解海盜咁押返香港。

叮！你有乜辦法證明人哋唔係去捕魚呀？打個譬喻吖，太一叮同你講落街買麵包，難道你有本事證明太一叮落街唔係為咗買麵包？當然啦，太一叮落街真係可以做好多嘢嘅，包括走去名下物業宣示主權，不過你的而且確冇辦法質疑唔係買麵包吖嘛！

即係咁，對敵人仁慈等於對自己殘忍，掉轉頭嚟講，對自己殘忍等於對敵人仁慈。一個中國政府係咁，一個香港政府係咁，餐餐殘忍對待自己友，不斷打壓民間保釣活動，邊個得益呀？咪就係你恨得牙癢癢嘅小日本囉。神聖領土被侵佔喇，明明要同胞們齊心團結槍口一致對外，官老爺偏偏最鍾意炮製「人民內部矛盾」。嗱，中港政府一次又一次長他人志氣滅自己威風，太一叮絕對唔反對有人將之歸類為漢奸行為。

或者咁講啦，朋友係要嚟賣嘅，鎯鎯係要嚟叮嘅，一眾疑似漢奸物體，麻煩各位企定定頭莫擰，請受太一叮保家衞國叮你個鎯鎯，國仇家恨一鋪叮！