近排香港人一聽加價兩個字就不寒而慄，家陣東隧又加埋一份，更加令人擔心。事關過海隧道一加價，其他交通工具例牌食住上，巴士、的士、電車已經排緊隊等加價，其他加價嘅申請實係陸續有嚟。更弊嘅係，西隧東隧先後加價，車輛湧晒去紅隧，唔逼爆都幾難。

叮，當局仲話想透過「紅加東減」呢招嚟分流車輛添，點知仲未出手，已經畀東隧先下手為強起咗尾注，你話係咪好笑呀！

話時話，東隧舊年大賺四億幾，家陣仲要大幅加價，實在離譜。不過咁，商家唯利是圖，罔顧社會利益，固然無良，但當局對海底隧道飛擒大咬束手無策，任人宰割，簡直無能。

運輸及房屋局話喎，當局會根據條例處理東隧申請，會先諮詢交通諮詢委員會及立法會交通事務委員會嘅意見，再交由行政會議審批咁話。講咗等於冇講，仲廢過「我阿媽係女人」！事實上，次次海底隧道申請加價，當局都話要按條例處理，但係結果都一樣。嗱，東隧上次申請加價遭否決，一怒之下申請仲裁，結果本來加五元變咗加夠十元添，吹脹！

當局仲話喎，三條隧道車流量嘅顧問研究，今季可以完成。叮，三條海底隧道車流量早就唔係乜嘢秘密，東隧每日約六萬四千架次，西隧五萬幾架次，紅隧日日都超過十一萬架次，呢啲數字係人都知，高官仲要研究乜嘢呀。咁簡單嘅數學題都要嘥公帑請顧問公司研究，不如請佢哋研究吓班官員午餐食乜嘢，晚餐又食乜嘢啦，笨！

其實，對於隧道公司任意加價，當局唔係乜嘢都做唔到，而係乜嘢都唔想做就真。好多人一早就建議當局一了百了，盡快買番東、西隧嘅專營權，淨係本報都唔知提過幾多次，可惜成班官員一味詐聽唔到。

太一叮諗唔明，當局前怕狼、後怕虎，究竟怕乜。有人話，當局係擔心隧道公司吊高嚟賣喎。查實，只要當局威脅喺原有隧道附近再起一條新隧道，降低收費，將車輛吸引過嚟，到時東西隧水盡鵝飛咯喎，睇佢哋頂得幾耐。

所以話啫，收番隧道專營權百利而無一害，班高官硬係唔肯做，左研究、右研究，搞咗咁多年都冇結果，真係廢到無倫。咁搞法，不如返鄉下耕田罷啦。叮！