「24」！除咗係早年美國一套超級受歡迎電視劇外，原來仲係新一個球季，中國巨星姚明喺NBA代表火箭每場出戰嘅最多分鐘時間。據火箭副會長兼運動訓練師基夫鍾斯透露，為咗確保姚明嘅腳骨承受壓力唔會超出負荷，新季無論任何情況，佢都最多只會上陣24分鐘，直至季後賽展開先會再作檢討。

免腳骨承受過大壓力

基夫鍾斯話：「24係個屬於全年嘅數字，直到季後賽先可能會有轉變。我哋嘅目標係要佢平平安安順利打到出年四月，將佢腳部負擔減到最輕。唔只比賽時間有限制，練習都一樣，假如周一同周三有比賽，周二就唔可以練習；連續兩晚出賽亦唔會有得傾。」

據知，包括火箭總經理莫雷同主帥阿杜文都已經答應，唔會同訓練團爭拗姚明嘅上陣時間，就算當比賽打到關鍵時刻，如果佢上陣超過咗24分鐘，就一定唔會再上陣。即使話之前一晚打少咗時間，亦唔會話喺第二日可以打多啲。莫雷表示：「我哋有證據顯示，過去兩年，長期達到35至40分鐘嘅比賽時間係令姚明受傷嘅主因，雖然我哋唔知依家個做法係咪最好，但都必須要試試。」