27/09/2010

播放本新聞相關短片

市民無氣可抖 焗做地球殺手

潮流興環保,講低碳。綠色生活由減少家居用電開始,譬如少開冷氣咁,照計冇乜難度,弊在呢招喺香港根本行唔通,好多家庭只有兩種選擇,一係開窗吸廢氣,一係閂窗歎冷氣,做地球殺手。

有環保團體訪問咗千幾個市民,過半受訪者話,開冷氣係迫不得已,隔籬單位冷氣機散出嘅熱氣吹晒入屋,惟有自己開埋一份。環保團體抽查全港十幾個屋苑嘅冷氣機位設計,發現唔少都有問題。有屋苑冷氣機散熱位喺窗台,影響上層住戶;亦有屋苑因為樓宇間距離太近,熱氣集中喺天井位,散唔到熱。

屯門一個居屋屋苑仲離譜,冷氣機散熱位同隔籬屋客廳相距得幾吋。環保團體話,樓宇間最少應相距十五米,家陣一伸手就過到隔籬,A單位開冷氣,B單位吹熱風,加埋噪音,唔開冷氣點頂?

叮!香港人口密集,土地有價,樓宇起到密質質無可厚非,但唔等於要密到好似沙甸魚罐頭咁。私人樓寸金尺土,空間用到盡唔出奇,連居屋屋苑都設計到密不透風,咁就真係抓晒頭。

樓宇密度過高唔係今日至有,「為藍天打氣」嘅口號亦嗌咗N咁多年,當局如果有心支持環保,早就應該做好市區規劃,使乜搞到隔籬鄰舍要互吸廢氣吖。

不過,諗落又唔出奇。港府低碳靠齋噏,減排當做騷,對環保從來都冇承擔,周詳規劃同長遠政策更加免問。當局近年話就話推出多項環保措施,可惜都係好大喜功嘅急就章之作,由膠袋稅、電動車到停車熄匙等,全部雷聲大、雨點小,甚至好似啱啱摺埋嘅慳電膽現金券計劃咁,突然間「壽終正寢」,問你服未?

呢,話口未完又多一鑊。環保團體警告話,內地明年實施電子廢物生產者責任制,嚴打非法棄置,大量電子廢物可能焗住積存喺本港,對環境造成嚴重污染,新界北地區更加係重災區。

查實,呢個問題已經困擾本港多年,據統計,○八年全港棄置嘅廢電器高達七萬噸,為堆填區帶來沉重壓力。不良業者隨便喺荒廢農地棄置電子廢物,搞到環境烏煙瘴氣。港府今年一月提出電子廢物處理諮詢文件,但相關草案依家都未向立法會提交。內地已經有成套針對非法棄置電子廢物嘅規範,香港仲喺度歎緊慢板,當局有冇心支持環保,畫公仔唔使畫出腸嘞啩?

環保係長遠嘅系統工程,要從大處着眼,小處着手。弊在港府眼高手低,大事做唔嚟,小事又唔做,將減排責任統統推畀市民,自己做逃兵。計太一叮話齋,旨意呢個政府救地球,蚊都瞓,蛇都死啦!

Money18 新功能「18好路數」為你預測心水股票升跌機會率