環境局計劃將清水灣郊野公園五公頃土地用嚟擴建將軍澳堆填區，立法會小組委員會要廢除相關指令，但當局一意孤行，律政司話立法會冇權廢除指令。

尋日立法會法律顧問明剃港府眼眉，話立法會絕對有權修改及廢除惡法，有議員質疑政府想挑戰立法會權力，就算對簿公堂都奉陪到底。當局尋晚縮沙，建議將擴建將軍澳堆填區嘅生效期押後到二○一二年一月一日。

叮！呢次差啲搞出憲制危機，港府要負最大責任。將軍澳堆填區臭氣問題存在多年，當局唔對症下藥，反而擴建堆填區，臭上加臭夾硬嚟 。

講真，一條黑路走到底，港府唔係第一次啦。嗱，呢次爭拗擺明係處理都市固體廢物措施不足所致，但當局來來去去淨係識堆填區，效果差強人意都一意孤行，結果咪撞板囉。

原來本港早就有人諗出紓緩堆填區壓力嘅好橋，但港府有眼無珠白白走寶。青洲英坭執行董事莊善敦踢爆，佢哋四年前已經向環境局遞交過「環保廢物熔化系統」方案，但當局睬都懶得睬。

簡單啲講，呢個系統由青洲英坭同香港科技大學合作研究，可以將水泥生產同燒垃圾結合，用都市固體廢物代替煤做燃料製造水泥，產生嘅灰燼仲可以作為水泥生產原料循環再用，呢樣嘢德國同日本已經有公司做緊。

物盡其用，多快好省，求其用吓腦都知掂啦！嗱，處理廢物之餘又可以改善空氣質素同提高環保效益，煤用少咗，氣體排放少咗，空氣質素自然好咗啦。

睇番成本，廢物熔化系統基礎成本二十億，每年處理費用二億；而環保署綜合廢物處理設施基礎成本要四十四億，處理費用二點五億；連每日處理量，廢物熔化系統都比環保署建議設施多六成，直頭高下立見。

更環保、更便宜又更高效嘅方法，政府吼都唔吼，理由竟然係實施新方法選擇嘅青洲英坭所在地踏石角，同港府選址唔同喎。效率高、成本低、排放少、唔擾民，只要達到呢啲目標，處理設施喺邊並唔重要。政府唔識寶，環保好橋當係草，你話係咪本末倒置，九唔搭八呀？

計太一叮話齋，呢啲咪叫擔嘢唔識轉膊囉。就算將軍澳堆填區擴建方案僥倖過骨，五公頃土地話咁快又爆滿，試問港府到時點算，係咪要填埋成個維港？叮！