數據顯示，香港今年已經錄得六十幾宗登革熱外地傳入個案，超過舊年全年總數，創出八年新高，最近更加有一位居住深水灣嘅外籍人士確診本地感染，另有多宗懷疑本地感染病例。衞生防護中心尋日宣布，當局已經將登革熱列為本土爆發處理，呼籲市民做好防蚊措施。

所謂登革熱病毒，主要由白紋伊蚊傳播，人類一旦染病，後果可大可小，輕則出現發燒、疲倦等徵狀，重則引發登革出血熱等併發症，令病人內出血、休克甚至死亡。台灣幾年前曾經爆發登革熱疫潮，導致五千幾人染病，二百幾人引發併發症，其中幾十人死亡。香港亦喺○二同○三年出現本地感染。

事隔七年，登革熱重臨香港，如果當局防範不力，隨時大爆發都有之。最得人驚嘅係，人類至今仍未完全破解登革熱嘅病毒，亦無預防疫苗，所以抗疫嘅最佳辦法就係保持環境衞生，撲滅蚊患。你知啦，港府一向將清潔工作當成做騷，有事就敲鑼打鼓全城清潔，平時就放軟手腳懶懶閒，清潔黑點無處不在，度度都有蚊蟲樂園。

呢，就講今年內，本報都收到唔少有關當局滅蚊不力嘅投訴。其中有元朗村民反映，村內蚊患持續多年，但食環署滅蚊極之被動，次次都要等到村長投訴先至做嘢。香港捉蚊協會曾經派人去流浮山捉蚊，一個人，兩隻手，短短一分鐘已經捉到廿隻，包括六隻白紋伊蚊。

滅蚊不力唔在講，就連蚊患指數都係信唔過嘅。本報記者早前四出視察，發現唔少誘蚊產卵器根本冇啟動，至於首位確診本地感染病人屋企深水灣同公司蘭桂坊一帶，居然連誘蚊產卵器都冇。嗱嗱嗱，捉蚊協會再次出動，到病人屋企附近捉蚊，一出手就捉到十幾隻，咁嘅環境，白紋伊蚊睇到都識笑啦，叮！

面對登革熱捲土重來，衞生署已經發信通知全港私家醫生，要求佢哋留意有登革熱病徵嘅病人，食環署係威係勢，話滅蚊絕不手軟。講就講得好聽啦，不過，最緊要係講到做到，如果唔係，到時太一叮就真係絕不手軟，起勢叮爆你個鎯鎯！