呢，警隊又爆出性騷擾醜聞。有位受害女警向本報投訴，指落馬洲分區有一名四十幾歲已婚警長，經常對女下屬毛手毛腳，譬如哄埋身索香水味啦、揩油啦、胸襲啦、摸大髀啦等等，受害女警起碼有四個。叮，差人嘅天職唔係除暴安良咩，幾時變成鹹鹹濕濕嘅「抽水王」o架？

其實，呢類事件已經唔係第一次發生。舊年，警察駕駛訓練學校一名女警長被同袍性騷擾；二○○七年，紅磡警署一名男警多次性騷擾師妹……最離譜嘅係前年，有位淫警居然喺警署認人房強姦女報案人。淫警橫行，理論上最安全嘅警署亦淪為罪惡溫床，保護市民變成侵犯市民，大家有事仲可以搵邊個呢？

警署亂七八糟，公立醫院更加係烏煙瘴氣。病人到醫院求診，就好似去咗十八層地獄，打錯針、開錯刀、輸錯血，折磨病人嘅手法五花八門，無奇不有。最近更加發生咗一單匪夷所思嘅風化案，一名十三歲外籍男童涉嫌喺東區醫院病房強姦五歲女病童，而當值醫護人員居然話忙得滯睇唔到喎！

唉，世風日下，道德淪亡，小小年紀已經淪為色魔，都咪話唔得人驚。香港歪風日盛，邪氣當道，其實唔係無迹可尋，大家只要睇睇近年愈來愈多校園風化案，就知道香港點解會淪落到咁嘅地步。教師同未成年少女去時鐘酒店開房有之，喺山邊同女學生玩「車震」有之，仲有淫師引誘女同學影裸照，真係幾賤都有、幾邪都有呀，叮！

正因為淫師愈來愈色膽包天，社會各界不斷要求當局設立性罪犯名冊，保障學生安全。奇就奇在，對於呢個合情合理嘅要求，港府居然用「私隱」為由耍手擰頭。叮佢個鎯鎯，當局縱容淫師入侵校園，唔止害人子弟，簡直為害成個社會。為人師表其身不正，將來教出嚟嘅學生會點，唔使講都知啦！

香港怪事多籮籮，要幾邪有幾邪，警隊醜聞不絕，醫院草菅人命，連作育英才嘅學校都變成淫師樂園。古人話，正氣存內，邪不可干，邪之所湊，其氣必虛。香港邪成咁，唔通真係氣數已盡？叮！