呢嗱，有社福機構分析過政府統計處嘅數據，發現今年上半年貧窮率急升，達到百分之十八，每五個港人就有一個窮人，有一百二十六萬人生活喺低收入環境。貧窮人口半年內多咗超過六萬，創下歷來新高。長者情況更慘，每三個人就有一個生活喺低收入環境，貧窮率高達百分之三十四。

點為之低收入？即係搵嘅錢少於全港住戶入息中位數一半，以一人家庭計，每月得三千二百七十幾蚊。收入奀成咁，點頂呀？返工交通費每月閒閒地成千蚊；住公屋好些少，如果租私樓嘅，幾十平方呎嘅板間房，每月租金都過千，份糧唔見咗一大半，仲使開飯嘅？

最得人驚嘅係，入不敷支窮到燶嘅唔係一千幾百個，而係一百二十六萬人，而且數字幾乎年年翻新。據社福機構推算，因為人口老化，長者及中年群組窮人數字急升，低收入人口十年後會去到一百四十二萬，二十年後，窮人數目更會飆升到一百六十六萬，問你驚未！

叮！港府開口以民為本，埋口紓解民困，結果係點大家有眼睇。扶貧愈扶愈貧，貧富懸殊愈來愈犀利，貧困人口仲屢創新高。事實勝於雄辯，當局扶貧唔止肥佬，直頭係交白卷！

話時話吖，港府坐擁逾二萬二千億元外匯及財政儲備，而且，呢個財政年度頭四個月賣地收入已超過全年預期，財政唔止冇赤字，仲可能錄得龐大盈餘添。庫房水浸，香港其實一啲都唔窮。最諷刺嘅係，本港堅尼系數竟然冠絕全球發達經濟體系。窮嘅愈窮，富嘅愈富，中產向下沉淪，低收入人數激增，呢啲簡直係香港之恥。

至弊港府一毛不拔，冇利用手上資源幫助弱勢社群。呢，連商界都睇唔過眼，大鬧港府係孤寒成性守財奴，令貧富懸殊嘅深層次矛盾無法解決，民怨同各種社會矛盾不斷加深。

施政報告就快出爐，尋日有團體上街表達訴求，希望政府還富於民，建議將交通津貼計劃擴展至全港十八區，全面檢討退休保障制度及放寬申領綜援入息上限等等。

講真，港府對低下階層欠帳太多，愈遲還後果愈嚴重。計太一叮話齋，如果新嘅施政報告又好似以前咁，對扶貧紓困冇長遠承擔，攞啲一次性派糖措施蒙混過關，最困難、最需要幫助嘅弱勢群體永遠都擺脫唔到貧窮，貧困人口數字永遠有升冇跌。