即係點先？當局要求兩電盡量利用天然氣發電，自己一啲承擔都冇，到時所有減排成本要市民孭，擺明搵笨啫。市民唔介意為減排盡一分力，問題係，改善空氣質素人人有責，唔等於港府可以卸責。

港府搞環保一向口水多行動少。「宏願」吹到天花龍鳳，講到資源投入就迴避責任，要企業同市民承擔。就好似一個無賴話要請人食大餐，龍蝦、魚子醬、紅酒唔靚唔點，埋單嗰陣左望望，右望望，詐睇唔到，博唔使找數。呢啲縮骨招，市民見得多咯。

叮！港府從來都將環保減排當騷嚟做，人有我有，不切實際，好大喜功，虎頭蛇尾，到頭來往往一事無成。呢，最「瘀」典型，莫過於聽落得啖笑，以今日之我打倒昨日之我嘅「慳電膽券」計劃嘞。

港府舊年嘅施政報告提出唯一一條派糖措施：慳電膽現金券，因為事前既冇深思熟慮，亦冇充分諮詢，惹起利益輸送疑竇，畀市民炳到七彩。新一份施政報告出爐前，當初落力推銷嘅邱騰華鬼鬼祟祟咁證實，慳電膽券已經壽終正寢玩完。市民、環保同管治威信「三輸」，當局派慳電膽券正一自己捉蟲。

港府急功近利，環保「大計」邊次唔係雷聲大、雨點小呀？嗱，好似擾民嘅停車熄匙措施咁，未諗清諗楚就夾硬提出，惹起強烈反彈。民意難違，惟有縮沙，當局前日回應話，「絕對願意考慮」豁免的士站停車熄匙，但小巴站頭兩架、同巴士開車前兩分鐘嘅豁免維持不變。

講真，豁免畀得的士，有乜理由唔畀埋小巴同巴士？只惠及的士，遲早嘈到拆天，再爆大鑊。如果一視同仁，停車熄匙等於名存實亡，兜兜轉轉返番原點，呢啲就叫做阿茂整餅，冇嗰樣整嗰樣嘞！

嗱嗱嗱，又有成班阿茂出嚟嘞。尋日「國際無車日」，眾高官湊熱鬧齊做環保騷，有啲安步當車，行路返工；有啲約埋坐「孖人」的士返政府總部；邱騰華最投入，坐港鐵去立法會。不過有環保組織踢爆，今年無車日少咗官員響應，除咗環境局官員，其他官對減排並唔熱衷。係咁，無車日不如叫扮嘢日算啦。

港府推卸環保責任有手絕招，先提出可望不可及嘅「宏偉目標」，話明巨額成本要市民自己科水搞掂，遇到強烈反對，就乘機收皮唔使做。環保得把口，減排靠搵笨，呢個政府認真蠱惑咯。叮！