「這輩子不還，下輩子也要還」，仲記得阿珍嘅金句嗎？唔使等下一世，香港即時已經現眼報。據估計，受惡導遊事件影響，黃金周七日假期訪港嘅內地旅行團數目，比舊年同期跌兩到三成。有業界人士話，內地旅行社驚再有不愉快事件發生，又怕畀人「放蛇」，唔會加大力度推銷香港遊。而且，下月底結束嘅上海世博，亦搶走咗唔少內地旅客。

黃金周啱啱開始，內地訪港旅客整體人數同舊年同期比較，最終係升定係跌，要埋單計數至知。不過咁噃，日本非法扣押中國漁船船長，唔少內地愛國同胞放棄遊東瀛；馬尼拉香港人質被殺，同胞仲杯葛緊菲律賓。競爭對手唔掂，香港居然冇得坐享「漁利」，內地旅行團不增反減，都咪話唔得人驚。

不過當局似乎冇有怕，仲煞有介事咁高調迎接黃金周添。旅遊事務署尋日話，已經同廣東及深圳旅遊部門啟動訊息交流同緊急聯絡機制，協調處理涉及兩地旅客嘅突發事件；入境事務處、警務處及相關部門成立跨部門聯合指揮中心；海關同警方會緊密合作，加強巡查專門接待內地團體旅客嘅店舖等等。

當局大陣仗迎接黃金周，內地同胞似乎唔多領情，係咪好諷刺呢？冇計啦，阿珍發晒爛渣嘅鏡頭，畀人擺上網全國「聯播」；事後同一間旅行社又爆出另一個女導遊鬧購物少嘅旅客「好狗不攔路，好人不擋財」，狠辣程度直逼阿珍。內地同胞見過鬼仲唔怕黑咩，何必再嚟畀人劏到一頸血，鬧到一面屁呀？

正所謂，女人唔補好易老，商譽唔保好易冇。一粒老鼠屎攪壞一鍋粥，本港旅遊業塊金漆招牌，想整污糟甚至毀壞佢，話都冇咁易；想整番好佢，重新建立「好客之都」形象，絕對唔係臨急抱佛腳，齋噏幾句，做一兩場「應節騷」就可以搞掂嘅。

講真，阿珍事件同埋眾多同類個案，問題根源都係政府監管唔到位，旅遊業「自己人管自己人」，卒之變咗無王管，亂咁嚟。每次醜聞之後，旅遊業議會都煞有介事咁查一輪，但到頭來往往雷聲大雨點小，對肇事旅行社高高舉起輕輕放下。

弊在咁荒謬嘅一幕，呢次對惡導遊事件處理又再重演，旅議會對聘用阿珍嘅旅行社，只係罰款了事。對於要求成立專責部門統籌同監管旅遊業嘅建議，當局就繼續無動於衷。

計太一叮話齋，如果港府唔擔起監管責任，做幾多門面工夫都盞嘥氣。黃金周無金可吸，旅遊業遲早要食西北風。叮！