其實對高官嚟講，做吓騷有乜咁難？由禮賓府到政府總部只有三百幾米，邊行邊吹口哨，唔使十分鐘就到。舊年無車日，高官都冇揸車返工，有人行路，有人逼巴士、地鐵，仲個個不知幾好笑口，成個環保天使咁款，吸引大批傳媒採訪，今年又有咁好嘅做騷機會，冇乜理由唔參與。

計太一叮話齋，高官揸唔揸車都係姿態嚟啫。對市民嚟講，最緊要係制訂好嘅環保政策，如果政策唔掂，就算班高官一年三百六十五日都唔揸車，香港都唔會有藍天白雲。

叮！講起減排政策實在失禮死人。嗱，一班人縮喺冷氣房裏面研究嚟研究去，度出停車熄匙呢條橋，可惜未實行已經怨聲載道。大熱天時要司機坐喺熄咗冷氣嘅車上等客喎，同焗桑拿有乜分別呀？先前環境局局長邱騰華畀班的士司機谷咗去坐熄咗冷氣嘅的士排隊，唔使一陣就頂唔順。局長大人，己所不欲，勿施於人呀！

面對全球氣候變化，政府請顧問公司提出未來十年嘅對策，聽起嚟係威係勢，實際上又係得啖笑。其他唔講，淨係減排目標已經鬼死咁難睇，無論點講香港都係經濟發達地區，但係當局設定嘅減排標準居然向發展中國家睇齊，難為班高官仲夠膽死自吹自擂。

講到減排措施更係無厘頭。港府嘅諮詢文件提出兩招，一招係十年後三成私家車、一成半巴士、貨車改用電力或者混合動力；另一招係將煤發電嘅比例由五成四減到不足一成，改用天然氣或者核能發電。

淘汰舊款巴士呢家嘢，當局唔知講咗幾多年嘞，可惜都係齋噏。大佬呀，話咁易咩，家陣全港只有百幾架歐盟第四期巴士，仲要二千幾架先至滿足需求，換一架車要三百幾萬，呢一大筆錢邊個出呀？

至於改變發電燃料呢一招，核能發電的而且確唔會排廢氣，但係核電洩漏唔係講笑㗎。早前大亞灣核電廠發生洩漏事故，已經搞到人心惶惶，依家仲話大幅增加核能發電比例喎，唔驚係假嘅。講到尾，當局呢啲減排大計都係煲冇米粥，減唔到廢氣，反而仲會擾民。

所以，太一叮奉勸各位高官，環保騷唔係唔可以做，便服日、無車日、無冷氣夜，樣樣都可以參與，但係要記住，如果你哋淨係只識做騷唔識做嘢，綠色生活永遠都唔會出現。