呢，旅遊業議會煞有介事一連三日進行大巡查，派人去全港各景點或購物點，抽查導遊證及商戶，呢招睇嚟都幾有效，暫時冇收到導遊逼旅客購物，或者商店劏客嘅投訴。相反，有啲內地客仲話導遊態度好咗添，佢哋仲讚加強巡查係好事，令旅客有保障，令香港遊有番口碑。

唉，如果一早咁做，咪唔會發生激死旅客事件，唔會有惡導遊阿珍出現，香港旅遊業個朵亦唔會搞到臭晒喇。遲到好過冇到，當局依家先至嚟補鑊，遲就遲咗啲，但點都好過冇，亡羊補牢未為晚也。之不過咁，唔好以為巡查幾日、做幾場騷就一天都光晒，事關劏客呢啲衰嘢，喺香港已經根深柢固，唔係放一兩次蛇就可以掃得清嘅，最緊要持之以恒，千祈咪三分鐘熱度，如果唔係，好快又會打回原形嘅咋。

計太一叮話齋，無論派出幾多巡查隊，抽查幾多店舖，都只能夠治標，要治本始終要靠完善嘅制度至得。業界人士就講得啱嘞，應該先解決團費及導遊收入問題，先至可以保障旅行團嘅質素。冇錯，如果零團費問題唔徹底解決，想導遊唔逼客人購物都幾難。

講開旅遊又講啦，近排中日關係緊張，有日本右翼團體發動反華行動，衝擊中國駐日機構不特止，仲圍堵中國旅行團，辱罵中國旅客。國家旅遊局漏夜發通告，提醒中國旅客去日本旅行要注意安全。

話時話，香港人都係中國人，日本右翼暴徒要搞事，唔會分邊個係內地人、邊個係香港人o架，所以，港府係咪都應該做番啲嘢呢，就算暫時唔需要發旅遊警示，但至少都要提醒吓港人喇。係人都知，日本係香港人熱門旅遊地點，每日都有唔少旅行團出發，有起事上嚟好大鑊o架。

點講都好啦，當局千祈要實啲，一發現事態惡化，就要發出旅遊警示。嗱，上次馬尼拉人質事件，當局即刻對菲律賓發出黑色旅遊警示，市民舉腳贊成。相反，當年泰國發生紅衫軍事件，港府後知後覺，令滯留泰國嘅港人變成海外孤兒，搞到民怨沸騰。

講到底，香港唔單止要做好外來旅客嘅接待，仲要保護出外旅行嘅港人安全，呢啲都係政府嘅責任，唔可以側側膊o架。