呢，又有一位男教師喺校園內非禮十五歲女學生而被判罪成，監禁十個月。呢位淫師仲係所謂「最佳教師」及虔誠基督教徒添，問你服未。

淫賤教師橫行，校園風化案接二連三，講到底，都係因為有當局處處呵護、諸多關照。點呵護法呀？嗱，有間中學請咗一名新教師，西裝骨骨，一表人才，點知有人踢爆，佢喺另一間學校任教時曾偷拍裙底被定罪。淫師定過罪仲咁容易搵到教職，咪就係靠當局呵護囉。

本來，教師犯罪留咗案底，教育局係有紀錄嘅，弊在當局唔將紀錄交畀學校，亦唔強制校方查閱，只係靠申請人自己填報，同埋學校自行甄別喎。叮！邊個求職者會自己打爛飯碗㗎？咁即係自欺欺人啫。

唔怪之得近年在職教師涉及性犯罪愈嚟愈多啦，淨係舊年就有十一宗，比前年急增五成七。有人同未成年女生去時鐘酒店開房；亦有人喺山邊同女生車震；最近有個「七十後」教師仲以影模相做藉口，吸引大班「九十後」女生影裸照，真係要幾賤有幾賤。

輿論一早就建議當局盡快設立性罪犯資料庫，但係當局推三推四，諸多藉口，話怕侵犯私隱，亦不利性罪犯更生喎。冇錯，維護教師私隱係重要，但都唔可以凌駕公眾利益，更加唔可以犧牲學生安全㗎。正如有專家話齋，性罪犯重犯機會好大，有個孌童犯搞過百幾個細路，坐完監出嚟又繼續作案。如果為咗保護呢種人嘅私隱，任由佢哋喺校園為非作歹，同送狼入羊群有乜分別呀？

查實，好多國家已立法公開性罪犯嘅資料，例如美國一早就設立性罪犯名冊供公眾查閱，嚴重性罪犯刑滿出獄仲要戴電子腳鐐。南韓當局最近亦喺網上公開首批因緩刑獲釋性罪犯嘅資料同相片，供公眾查閱。人哋外國政府咁樣做，都冇人話侵犯私隱喇。

太一叮諗極都唔明，外國可以做，香港點解唔可以？講到尾，唔係做唔到，而係港府唔肯做。為學生提供安全嘅學習環境，確保佢哋免受性侵犯，係任何一個政府嘅責任，如果港府咁都唔肯做，不如收皮喇，叮！