28/09/2010

播放本新聞相關短片

熱火空軍基地集訓

新一季NBA仲有一個月就揭開戰幔,因為擁有「Big3」成為傳媒焦點嘅熱火,為令球員專心備戰,今日會進駐美國空軍基地,進行為期6日嘅訓練,誓為取得總冠軍打好基礎!

消息指熱火今次進駐嘅埃格林空軍基地,距離邁阿密650英里,係美國空軍裝備司令部4大產品中心之一,難怪熱火會接受對方邀請,相隔23年後首次喺南佛羅里達外展開訓練營。熱火會喺香港時間今朝入營,住喺入面一家酒店,每日進行兩課操練,並可享用基地內所有設施,參與基地中一系列活動。

埃格林空軍基地上校普列亨對熱火嘅集訓成效充滿信心:「我哋擁有追求完美、強調奉獻同執行力嘅優良傳統,我知道熱火亦想達到呢個要求,呢點亦係我哋邀請佢哋嚟呢度集訓嘅原因!」

享用設施學團結互助

至於熱火教練史普斯達就發聲明多謝對方:「喺呢度訓練,會令我哋更專注籃球,唔受外界騷擾,樹立團結、互助呢啲重要信念。更重要係可以同捍衞國家自由嘅空軍戰士一齊相處,從佢哋身上學到某啲特質。」

其實熱火真係好需要呢啲與世無爭嘅清靜環境練波,事關勒邦占士日前同韋迪、保殊齊齊入場去睇一場NFL比賽,結果引起一輪哄動,試問喺咁多誘惑下又點可以專心練波預備新球季呢?