近排經濟環境好轉，公屋富戶愈嚟愈多，全港有兩萬幾戶，佢哋霸住公屋唔肯搬走，令真正有需要嘅人望屋興嘆。本來法例規定，公屋富戶要交倍半至兩倍租金，部分甚至要交市值租金，仲要喺一年內遷出。可惜法例形同虛設，咁多年嚟被勒令遷走嘅公屋富戶數字，少到連房屋署都唔敢披露，聽講唔超過十戶。

講鬼咩，房署官員欺善怕惡，欺貧怕富，見到富戶就腳軟，佢哋淨係識得恰窮人嘅啫。呢，有位來自浙江嘅陳女士持雙程證來港探親，同丈夫住屯門一個公屋單位。丈夫今年初不幸因病過身，身後事都未辦完就接到房署通知，話佢冇香港居留權，要喺一個月之內遷出公屋單位。

大佬呀，人哋千里迢迢來港探親，丈夫忽然過身，加上人生路不熟，叫天不應，叫地不靈，作為政府官員唔想辦法安慰，提供必要嘅援助，反而落井下石，第一時間將人哋掃地出門，使唔使做到咁絕呀？唔通真係叫人瞓街咩？

叮，依法辦事唔係唔啱，但法律不外乎人情，房署官僚僵化，墨守成規，簡直涼薄兼冷血。難怪有區議員睇唔過眼，直斥房署死板，淨係識得一刀切，不近人情。

其實，房署根本唔當低下階層市民係人，對內地新移民更加係諸多歧視。正如有立法會議員話齋，新移民如果不幸喪偶或者離婚，又未住滿七年，即使有迫切嘅住屋需要，房署都唔會伸出援手。嗱，有位趙女士帶埋個女持單程證來港同丈夫團聚，後來感情不合離婚，卒之搞到要瞓公園，真係令人心翳。

本來，房署同社署都有責任向遇到困難嘅內地新移民提供急需援助，可惜呢兩個部門冇嘢叻，踢波最叻，經常將求助者踢嚟踢去。有人要求解決住房困難咩，社署就一腳將個波踢畀房署，「唔關我哋事，搵房署啦」，而房署又一腳將個波踢番轉頭，「如果想獲恩恤照顧，要有社工推薦」。咁樣踢嚟踢去，求助者想唔瞓街都難啦。

富戶霸公屋，窮人瞓街邊，呢啲就係香港嘅現實。冇計喇，遇着呢班涼薄官員，大家惟有自求多福喇。叮！