不過，唔好以為貧窮地區至會出現上述情形，喺香港呢個號稱國際金融中心嘅大城市，同樣存在九反之地。呢，本報記者前往深水埗通州街公園視察，發現嗰度烏煙瘴氣立立亂，已經成為「毒品交易所」，唔少道友買完毒品就地開餐，就算有人行過都若無其事。

毒禍氾濫不特止，公園裏面仲有大把特色攤位，呢度一檔十五胡，嗰度一檔鋤大Dee。記者行入公園，忽然有個中年婦女埋嚟兜搭：「一百蚊，對面有房。」真係黃賭毒都有齊呀，叮！

唉，休憩公園變成罪惡溫床，附近居民無日安寧，為人父母嘅日日擔驚受怕，唔知仔女幾時成為罪犯獵物。嗱，今年初就有一位兩歲小妹妹喺公園被拐，失蹤十個鐘後先至搵番。居民好無奈咁話，公園真係太亂，一定唔會放小朋友入去玩。

咦，公園淪為九反地，附近居民就話無可奈何啫，太一叮就話管唔到啫，除暴安良嘅警察無理由管唔到啩？卻原來，警方今年上半年喺區內進行五百幾次反罪惡突擊巡查，總共只搗破十二宗涉及毒品案件，拉咗十二個人，至於例行巡查咯喎，一日一次咁大把，而且通常喺凌晨時段，可以話係主動避開罪犯，有巡查等於冇巡查。

之所以出現咁嘅情形，有兩個合理推論。一係因為通州街公園隸屬深水埗警區，而受影響嘅居民就住喺旺角警區嘅管轄範圍，兩個警區你推我讓，得過且過，齊齊放軟手腳。而負責管理公園嘅康文署更加係隻眼開隻眼閉，管理員淨係識得勸街坊去其他公園，見到有人犯法都唔報警。根據特衰政府嘅官僚邏輯，多老母等於冇老母，多人管通常等於冇人管。

至於另一個合理解釋，就係警察叔叔實在太忙，一時要上街遊行爭取加薪，一時又有人上樓探姐姐仔食霸王餐，最近玩無可玩，又派出水警幫海事處阻撓保釣人士。咁多嘢做，邊得閒維持公園治安呀？

賭毒氾濫官懶理，公園淪為九反地。話口未完，附近屋苑居民已經喺網上發起簽名行動，要求警方正視問題。好心警察叔叔，唔好再不務正業啦，快快出手撲滅罪行，還番個休憩場所畀居民啦，叮！