細路仔玩泥沙相信大家都見過，一班小朋友喺沙灘將啲沙堆起嚟，有時砌成一個山仔，有時又砌成一間屋，總之諗到乜嘢就砌乜嘢，砌完覺得唔啱心水又可以推倒重來。

點解會諗起呢啲陳年舊事嘅呢？事關港府施政有時真係兒戲到唔使恨，好多政策呢頭推出，嗰頭就放棄，直情好似細路仔將泥沙砌嚟砌去咁。

其他先唔講，就講慳電膽現金券計劃，本來係舊年施政報告提出嘅派糖措施，當局建議由兩家電力公司向市民每戶派發一百蚊慳電膽現金券，鼓勵市民用慳電膽代替鎢絲燈泡。邱騰華等人搏命硬銷，吹到天上有地下無。佢仲下巴輕輕承諾多多，話要做到唔使加電費，又話要研究擴大現金券嘅適用範圍，又話要擴大慳電膽回收點，仲話要避免產生水銀污染。

點知話口未完就爆出「益親家」疑雲，跟住又有人踢爆，慳電膽唔單止唔環保，市民仲要交多啲電費。加上邱騰華嗰啲承諾又全部冇實現，於是乎，市民同傳媒都窮追猛打，要政府交代內情。睇見咁嘅環境，政府惟有死死氣宣布將計劃擱置。

其實，政府喺施政報告提出政策然後又唔算數，都唔係第一次嘞。前年施政報告原本話要將長者生果金加到一千元，但同時要引入資產審查機制，各界就狂批政府涼薄，罔顧長者利益。政府陣腳大亂，急急腳轉軚取消入息審查，前後唔夠兩個星期，施政就要作咁大改動，真係令人眼花繚亂。

計太一叮話齋，擱置慳電膽計劃、取消生果金資產審查都冇做錯，問題係，既然原有政策漏洞百出，點解可以寫入施政報告？當局做乜嘢唔認真諮詢，就將未經深思熟慮嘅政策推出？難怪環保團體直斥當局推出政策時一貫草率，好似停車熄匙及增加核能發電比例至五成，都冇充分諮詢，一旦面對社會反響，就要大幅修訂，甚至收回。

叮！呢種事如果一而再、再而三咁發生，政府邊度仲有公信力㗎！嗱，新一份施政報告好快就要出爐嘞，唔知當局識唔識得吸取教訓呢？如果又係閉門造車，朝令夕改，咁就累人累物咯。

總之都係開頭嗰句，政府施政唔係細路仔玩泥沙，絕對唔可以兒戲。叮佢個鎯鎯！