乜嘢叫做離港限制呀？就係領取生果金嘅一年內，離港最多二百四十日，否則按比例扣除金額，長期喺內地居住嘅長者就一蚊都冇。

話時話，有頭髮冇人想做瘌痢，如果有錢有樓住，邊個長者唔識得喺香港享清福呀？好多公公婆婆捱咗大半世，只有雞碎咁多積蓄，香港物價升到嘭嘭聲，啲錢眨吓眼就用晒。內地生活指數較低，好多長者願意返內地住，諗住安享晚年啦，點知近年內地物價猛升，令佢哋失晒預算。如果有生果金仲可以幫補吓，點知當局偏偏要將長者趕盡殺絕。

嗱，尋日好多公公婆婆喺記者會上大吐苦水。八十三歲嘅雷先生退休後同太太移居內地，結果雙雙無緣攞生果金。佢嬲爆爆咁話：「辛辛苦苦幫咗社會幾十年，諗住返鄉下過埋最後兩年，點知因為離港限制領唔到生果金，好唔合理。」

其實，最慘情係本報早排報道過嘅嗰位九十六歲潘婆婆。佢退休後帶咗幾萬蚊積蓄返番禺養老，諗住落葉歸根。家陣積蓄用晒，又周身病，因為係港人，無法享受內地嘅醫療福利，想申領香港嘅生果金咩，又唔符合離港限制，山窮水盡惟有返香港入住老人院。好似潘婆婆咁嘅畸士唔少㗎，工聯會過去兩年就送咗百幾個長者返香港。

太一叮諗極都唔明，社署點解要咁樣做呢？每月有一千蚊生果金，長者就可以喺內地生活。如果冇生果金，佢哋就要返香港，多數都要入住老人院，每月閒閒地用七、八千蚊公帑。一千同八千，邊個多邊個少，三歲細路都識計啦，點解社署硬係要慳細錢嘥大錢呢？

仲有，本港老人院舍宿位長期嚴重不足，好多人等到死都入住唔到。移居內地嘅長者人數真係唔少㗎，淨係珠三角一帶就有四至六萬，如果佢哋都殺晒返香港，都申請老人院宿位，睇政府點頂！

所以話啫，當局對生果金設離港限制，其實係損人不利己。無他嘅，呢班官僚不嬲墨守成規，要幾死板有幾死板，無論做乜都係少件事好過多件事，話之你長者瞓街啦。唉，難為佢哋仲好意思吹水，話生果金係用嚟敬老喎，虐老至真！叮！