雖然涉事藥房聲稱無呃人，指藥膏定價係由公司決定，願意就事件道歉。但無論點講都好，呢種做法的確好有問題。正如立法會議員話齋，藥膏只係日常用品，唔同珠寶古董等無價寶，商戶應該合理定價。旅遊業議會亦批評，藥房職員涉嫌用武力嘅做法好離譜，嚴重影響本港旅遊業形象。

好事不出門，醜事傳千里。呢位台灣旅客將事件過程拍低上載網絡，被台灣傳媒廣泛報道，吸引好多網民瀏覽，唔少人批評呢種行為敗壞香港旅遊品質，怒斥「香港之恥」。亦有香港網民到台灣討論區留言：「對於有旅客在香港遇上黑店被騙，身為香港人感到十分羞愧無奈，因為政府監管不力，所以類似事件將會不斷重演！」

叮！網民就講得啱嘞，正正由於港府監管不力，香港旅遊業醜聞不斷，類似嘅購物爭拗不時都有。更加離譜嘅係，不時有電器舖用高價向旅客兜售電器，有海味舖用大大隻字標出商品售價，但重量標示就幾乎細到睇唔到，誤導旅客買貴嘢。大家都知，呢類舖頭開到成行成市，有啲公然違法，有啲鑽法律罅，已經係公開嘅秘密，但當旅客投訴時，警方就一味用「搜證困難」等理由敷衍了事，係都要等到爆出醜聞先至肯做嘢。

除咗執法不力，保障消費者同旅客嘅法例亦係漏洞多多。有律師指出，雖然港府準備修訂《商品說明條例》，但修訂內容只係建議將不良銷售手法列為刑事罪行，對商戶賣貴貨依然冇約束力，而旅客喺香港逗留時間唔長，冇可能貨比三家，所以買嘢時好容易買貴咗。喂，既然法例修改後都保障唔到旅客，當局係咪應該盡快檢討吓呢？

咪話太一叮唔提醒，今時今日，網絡嘅影響力真係好大，任何消費爭拗一旦畀人拍低放上網，即使小爭拗都可能變成大風波，當局事後補鑊根本無濟於事。最有效嘅辦法就係防患未然，做好監管工作，唔好再發生類似醜聞。須知商譽易毀難建，「購物天堂」嘅招牌唔保好易冇o架，叮！