李先生為此入稟司法覆核，高等法院原訟庭尋日判決，法官雖然對申訴人深表同情，仲批評現行傷殘評定制度無視傷者實際情況，但又話申訴人冇質疑制度合法性，社署只係依足制度辦事，所以判申訴人敗訴。

李先生唔服，表明會上訴。而有立法會議員直斥判決不食人間煙火，令人憤怒同不滿，話會繼續協助申訴人上訴。

又唔怪得佢哋咁慶嘅，講真，社署咁樣對待李先生實在太涼薄。佢係躉船工人，成日都要擒上擒落，家陣冇咗一條腿，路都行唔到，點開工呀？轉行咩？根本冇可能，連法官都話，以佢嘅背景同教育程度好難再搵到新工。但係社署死都話人哋只喪失百分之八十五工作能力，請問各位官大人，你哋可以搵份乜嘢工畀呢個只有百分之十五工作能力嘅人做呢？

更令李先生唔忿氣嘅係，有工友同樣因工受傷，亦切除一條小腿，但就成功申請傷殘津貼，點解同人唔同命o架？

唔講真係唔知，現時社署審批傷殘津貼嘅標準係三十幾年前制訂嘅，更弊嘅係，就算按照咁嘅過時標準，社署都係一時一樣亂批。正如法官話齋，社署將審批決定權交晒畀醫生，冇負起應有責任。其實醫生只得幾分鐘診斷時間，冇可能詳細檢查，只可以根據表面情況同病歷上嘅資料填寫醫療評估表格。你話係咪好兒戲呢？有乜法子唔成日擺烏龍！

要講烏龍畸士，一日一夜都講唔完。例如有位申請人左手全部手指都被切除，先後七次申請傷殘津貼，而每次評估嘅結果都唔同，一陣話右手手指全部切除，一陣又話左手被輾碎，更離譜嘅係，居然無端端話人哋「完全失明」。對呢啲亂七八糟嘅所謂評估，社署居然照單全收，你話係咪好搞笑。

另外，有位申請人患有小兒麻痹症，頭三次申請傷津獲批准，後來情況冇任何變化，但第四次申請就被拒絕。都唔知社署按乜嘢標準審批嘅，其實根本就冇標準，鍾意批就批，唔鍾意批就唔批，吹咩！

講到尾，社署其實係縮骨，出咗事由醫生負責，佢哋唔使孭鑊，話之你啲傷殘津貼係唔係用喺有需要嘅人身上啦！咁搞法，連申訴專員公署都睇唔過眼，舊年主動調查，踢爆社署九宗罪，輿論亦窮追猛打，社署先死死氣話要檢討，但風頭一過，又當乜事都冇發生過。

叮佢個鎯鎯，睇嚟要搵醫生評估吓社署高官嘅腦部功能嘞，唔使問阿桂，都係百分百傷殘啦，不如發啲腦殘津貼，叫佢哋返歸罷啦。