話口未完，前日又有一個淫師被定罪。被告係小學男教師，佢以補習為藉口逼未成年女學生做性奴，仲將淫辱過程拍攝落嚟，逼受害人對住鏡頭宣誓永遠忠於佢，簡直禽獸不如。

法官直斥賤男嚴重濫用女童及其母親嘅信任，對女童極盡剝削，造成心理創傷。講得啱！為人師表應該愛護學生，但呢個賤男將學生當做洩慾工具，真係天理難容，人神共憤！

對呢種教師中嘅敗類、賤男中嘅極品，無論處以幾重嘅刑罰都冇人會反對。可惜香港法律冇宮刑，否則好似古代處罰強姦犯咁，「嚓」一聲剪咗條是非根，大家一定拍爛手掌。其實，家陣好多國家對色魔都施行類似懲罰，例如南韓會施行化學閹刑，令罪犯唔會產生慾念。

本港各界主張重罰淫師，係因為校園風化案愈嚟愈多。過去四年當中，在職教師捲入風化案被定罪個案就有十六單。不過呢啲只係冰山一角咋，仲有唔少色狼匿埋喺校園入面，隨時跳出嚟害人。

今時今日，世風日下，道德淪喪，加上淫賤傳媒推波助瀾，網絡上又充斥淫賤內容，喺咁嘅氛圍當中，性犯罪個案勁升一啲都唔奇怪。問題係，學校係教書育人嘅地方，點會畀淫賤教師混入去為所欲為㗎？政府唔做嘢嘅咩？

靠政府打擊淫師嘥氣啦。講真，正因為制度漏洞多多，部分有案底嘅淫師趁機重新混入校園，令學生人人自危。

社會各界多年前就要求當局建立性犯罪資料庫，法改會今年初又建議設立性罪犯名冊，立法會亦通過動議，要求盡快立法。如果政府一早肯咁樣做，就唔會有咁多校園風化案啦。嗱，學校請人時查吓性罪犯名冊，咦，條友榜上有名噃，對唔住，唔該另謀高就啦。可惜，政府一味拖拖拉拉，硬係唔肯做。

仲有，教師犯罪留咗案底，教育局係有紀錄嘅，弊就弊在教育局唔會將紀錄交畀學校，亦唔會要求校方去查紀錄，只靠申請人自己填報，再由學校自行甄別。邊個求職者會自己打爛飯碗㗎？咁咪即係自欺欺人！叮！

政府大條道理，話咁做係為咗要保護教師私隱喎。請問，究竟學生嘅安全緊要，定係淫師嘅私隱緊要呀？

叮佢個鎯鎯！政府幫淫師隱瞞醜惡歷史，即係攞張羊皮披喺狼身上，掩護佢哋混入羊群。講得白啲，政府就係淫師作案嘅幫兇。官僚助紂為虐，校園永無寧日，學生家長自求多福罷啦。