早排港府突然轉性，拍心口話十八區要「區區有骨灰龕」，實情係幾乎區區撞板。呢，元朗新圍村尋日又有幾十個村民示威，抗議當地有歷史建築畀人改建做骨灰龕場，發展商被迫押後開光儀式。

骨灰龕政策諮詢期月底屆滿，但港府原定最快下個月公布嘅兩張分列符合同唔符合土地契約私營骨灰龕名單，唔保證如期出爐。食物及衞生局副局長梁卓偉只係話，「期望」下月中可以公布有關名單。

佢又話，因為好多複雜嘅法律問題，只能夠承諾「盡快公布」。如果市民唔好彩中招買咗非法龕位，對唔住，當局唔會應承日後可以優先轉用公共龕位，因為唔想鼓勵更多違法經營者用同樣手法「搵快錢」喎。

又難怪梁副局長預先閂定後門嘅。嗱，連佢自己都話，唔符合規定嘅骨灰龕場仲多過循規蹈矩嘅，如果當局一口應承，容乜易個個有樣學樣，話之你乜規矩，一窩蜂起骨灰龕，甚至好似賣樓花咁賣埋「龕花」，掠一筆至算，出咗問題就由納稅人埋單囉。

叮！話到尾，解鈴還須繫鈴人，骨灰龕位供求失衡之所以愈來愈嚴重，演變成政治問題，始作俑者就係港府。嗱，近年由政府提供嘅骨灰龕位只佔全港火葬宗數一成幾。公營龕位遠遠滿足唔到需求，市民咪惟有幫襯私營業者囉。

家陣私營龕位民居有、農地有、郊野公園有，早排連佛門清淨地亦淪陷，搞到「佛都有火」，天怒人怨。弊在當局長期無監無管，違規經營骨灰龕氾濫成災，市民根本唔知邊啲龕位日後有手尾跟，萬一中招，破財事小，先人死無葬身之地就大件事咯。

呢，尋日梁卓偉呢頭叫有需要嘅人致電規劃署查詢，嗰頭就有市民踢爆，話試過打電話去問，同樣不得要領，半日都未搞清楚自己買落嘅龕位到底合唔合法，係咪「僭建」，第日會唔會畀政府「迫遷」。連回應查詢咁簡單嘅嘢都甩晒底，叫市民點相信港府有能力負起監管責任呀？

叮！龕位供應斷層嘅舊債未還，「區區有骨灰龕」冇晒下文，又添新債。靠把口齋噏冇用嘅，港府不如多做實事。一方面抓緊時間喺冇爭拗嘅地點落實增建龕位，等市民唔使咁徬徨；同時盡快確定公布合乎規劃及違規經營者名單嘅時間，避免不良業者有機可乘。

計太一叮話齋，港府高地價政策令生者難有其屋，無所作為又令死者難有其龕，唔通要搞到港人「生死兩茫茫」至安樂？