估唔到將負面訊息「河蟹」表現最積極嘅，居然係負責治安嘅香港警隊。原來港人嘅知情權已被大幅削弱，根本無從知道自己面對緊乜嘢安全威脅。新聞團體踢爆，舊年下半年警方平均每日公布嘅突發事件訊息只得二點七宗。保安局資料顯示，自○四年引入第三代指揮及控制通訊系統以來，按每日平均數計，警方公布嘅突發事件數字逐年遞減，○六年係四點一五宗，○七年大跌一半，得二點一六宗；到○八年仲搞嘢，少到只有一點一四宗。
叮！齋睇表面，治安似乎愈來愈好，冇事發生吖嘛。七百萬人口嘅國際都會，突發事件平均每日一單多啲，攞個「全球最安全城市」金漆招牌話都冇咁易。弊在數據同事實相差十萬八千里，根本就係當局箝控訊息發放之下嘅「怪胎」。
警方使用數碼化嘅第三代指揮及控制通訊系統之後，按新機制公布突發事件，只會喺確定「事件涉及公眾利益或重大事故」之後，由警察公共關係科向傳媒「放料」。
披露乜嘢、幾時公布、講幾多，主動權完全喺警方手上，傳媒只能夠被動等人「餵」。一如所料，從此大部分罪案都好似人間蒸發咗咁，冇對外公布。警方發放訊息少得可憐，市民知情權嚴重剝削。
系統啟用以來，好多涉及名人及高官嘅事件，甚至一啲棄屍案、滅門案等市民覺得重要嘅新聞，警方都冇對外公布，或者好遲至知會傳媒，呢啲仲唔係濫用權力箝控訊息？
更弊嘅係，呢個系統可以令當局名副其實達到「控制通訊」嘅目的，透過選擇性披露對港府有利嘅訊息，將新聞自由摧毀於無形，當局可以有恃無恐，和尚擔遮，無法無天。
警隊高層當初估計，系統目標係每日發放三至四十宗突發訊息，更承諾會喺事發後廿分鐘內通知傳媒，結果訊息愈發愈少，承諾根本冇兌現。
叮！梗係啦，近年警隊自己都醜聞不絕，警官以水警輪接載去離島開海鮮大食會、利用市民做「人肉路障」攔截飛車黨、警員喺警署內強姦報案人等。你話嘞，咁嘅瘀嘢警方點會主動引爆？之但係，咁嘅通訊系統，市民同傳媒又點信得過吖？
負面新聞冚晒，社會點會和諧。回歸以來，經濟停滯不前唔在講，港人曾引以為傲嘅新聞自由，執法部門都欲去之而後快。計太一叮話齋，唔使等五十年，特區衙門將會全面內地化，一國兩制提早玩完。
